روس ’عالمی تباہی‘ برپا کرنا چاہتا ہے، زیلنسکی

یوکرین کے صدر وولودیمیر زیلنسکی نے الزام لگایا ہے کہ روس نے از میل میں ڈینیوب بندرگاہ پر حملوں کے بعد خوراک کی عالمی منڈیوں میں عدم استحکام پیدا کر دیا ہے۔ انہوں نے ماسکو پر خوراک کی منڈی کے خاتمے کی کوشش کرنے کا الزام لگایا۔

زیلنسکی کا کہنا تھا کہ روس نے ازمیل بندرگاہ پر حملہ'عالمی تباہی‘ برپا کرنے کے ارادے سےکیا تھا۔ زیلنسکی نے اپنے شبینہ ویڈیو خطاب میں کہا، "روسی ریاست کے لیے یہ صرف ہماری آزادی اور ہمارے ملک کے خلاف جنگ نہیں ہے۔ ماسکو ایک عالمی تباہی کے لیے جنگ لڑ رہا ہے۔ اپنے پاگل پن میں وہ خوراک کی عالمی منڈیوں کو تباہ کرنا چاہتا ہے، اسے قیمتوں کے بحران کی ضرورت ہے، اسے رسد میں رکاوٹ کی ضرورت ہے۔‘‘

 

بحیرہ اسود کے اناج کے معاہدے کے خاتمے کے بعد از میل کی ڈینیوب بندرگاہ نے یوکرین سے باقی دنیا کو اناج کی سپلائی کی ترسیل کے لیے اہم متبادل راستے کے طور پر کام کیا۔

 یورپی یونین کے اعلیٰ ترین سفارت کار جوزف بوریل کا کہنا ہے کہ روس دوسرے ممالک کا خود پر 'انحصار' قائم کرنے کے لیے رعایتی اناج کا استعمال کر رہا ہے۔ انہوں نے خبردار کیا ہے کہ روس اپنے جغرافیائی سیاسی فائدے کے لیے کمزور ممالک کو سستا اناج فراہم کر رہا ہے۔

 جوزف بوریل نے کہا، ''جب کہ دنیا سپلائی میں خلل ڈالنے اور زیادہ قیمتوں سے نمٹ رہی ہے، روس اب کمزور ممالک سے رعایتی قیمتوں پر اناج کی ترسیل کی دو طرفہ پیشکشوں کے ساتھ رابطہ کر رہا ہے، اور اس مسئلے کو حل کرنے کا بہانہ کر رہا ہے جو اس نے خود پیدا کیا ہے۔‘‘

انہوں نے کہا، ''معاشی کمزوریوں اور عالمی غذائی عدم تحفظ کو بڑھا کر نئے انحصار پیدا کرنے کے لیے جان بوجھ کر خوراک کو بطور ہتھیار استعمال کرنے کی یہ ایک مذموم پالیسی ہے۔‘‘

اقوام متحدہ کی سلامتی کونسل  فوڈ سکیورٹی کے موضوع پر آج جمعرات کی  شام ایک خصوصی اجلاس منعقد کر رہی ہے۔ اس اجلاس کی صدارت امریکی وزیر خارجہ انٹونی بلنکن کریں گے۔

ش ر⁄ ع س ( روئٹرز، ڈی پی اے، اے پی، اے ایف پی)