زر مبادلہ کے پاکستانی ذخائر مستحکم، مالیت سترہ بلین ڈالر

پاکستانی دارالحکومت اسلام آباد سے جمعرات اکیس اپریل کو ملنے والی رپورٹوں کے مطابق اسٹیٹ بینک آف پاکستان نے اپنے ایک بیان میں کہا ہے کہ اس کے پاس زر مبادلہ کے ذخائر کی موجودہ مجموعی مالیت 10.88 بلین ڈالر بنتی ہے۔ اس کے علاوہ اگر ملکی کمرشل بینکوں کے پاس موجود فارن ایکسچیج کے ذخائر کو بھی شامل کیا جائے، تو زر مبادلہ کی مالیت تقریباﹰ 17 بلین ڈالر بنتی ہے۔

پاکستان: آئی ایم ایف قرضہ بحال کرنے کی کوشش

اسٹیٹ بینک آف پاکستان  نے اپنے بیان میں کہا کہ اس جنوبی ایشیائی ملک کے پاس موجود زر مبادلہ کے ذخائر مستحکم ہیں۔ ساتھ ہی ملکی مرکزی بینک نے یہ بھی کہا، ''سولہ اپریل کو ختم ہونے والے گزشتہ ہفتے کے دوران اسٹیٹ بینک آف پاکستان کے پاس زر مبادلہ کے ذخائر میں 36 ملین ڈالر کا اضافہ ہوا اور ان کی کُل مالیت بڑھ کر 10 بلین 885.7 ملین ڈالر ہو گئی۔‘‘

سیاسی بحران اور پریشان کن مالیاتی صورت حال

پاکستان کو اس ماہ کے اوائل تک ایک ایسے سیاسی بحران کا سامنا رہا تھا، جو کئی ہفتے تک جاری رہا اور جس کے اختتام پر سابق وزیر اعظم عمران خان کی حکومت ختم ہو گئی اور شہباز شریف نئے ملکی وزیر اعظم بن گئے تھے۔

عمران خان کا ٹوئٹر اسپیس سیشن: ’فوج کے خلاف بات نہ کریں‘

ان بحرانی حالات نے ملکی معیشت اور سٹاک مارکیٹوں کو بھی بری طرح متاثر کیا تھا اور امریکی ڈالر اور یورو کے مقابلے میں پاکستانی روپے کی قدر ریکارڈ حد تک کم ہو گئی تھی۔

پیٹرول اور بجلی کی قیمتیں: نئی پاکستانی حکومت کا سبسڈی کے خاتمے پر غور

اس دوران یہ بھی ہوا کہ بیرونی قرضوں کی واپسی کی وجہ سے زر مبادلہ کے ملکی ذخائر میں بہت زیادہ کمی بھی دیکھنے میں آئی۔ تب گزشتہ حکومت کے وزیر خزانہ نے کہا تھا کہ فارن ایکسچینج ذخائر بس اتنے رہ گئے تھے کہ ان کے ذریعے ملک میں غیر ملکی درآمدات کے لیے صرف تقریباﹰ 50 دنوں تک ہی کی ادائیگی کی جا سکتی تھی۔

اب لیکن اسٹیٹ بینک کے مطابق زر مبادلہ کے ذخائر میں کافی بہتری ہوئی ہے اور سیاسی صورت حال بھی قدرے مستحکم ہو چکی ہے۔ ماہرین کو توقع ہے کہ سیاسی صورت حال میں استحکام معاشی حالات میں بہتری کا باعث بھی بنے گا اور اقتصادی شرح نمو میں بھی اضافہ ہو گا۔

م م / ش ح (روئٹرز،ایس بی پی)