سمندری طوفان فلورنس

سمندری طوفانوں کی اصطلاح میں کسی بھی سمندری طوفان کے مرکزے کو آنکھ سے تعبیر کیا جاتا ہے۔ یہ مرکزہ یا آنکھ جس رفتار سے گھومتی ہے، وہی اُس کی شدت کا تعین کرتی ہے۔ بدھ بارہ اگست تک فلورنس سمندری طوفان شدید طوفانوں کی کیٹیگری چار میں تھا۔ جمعرات کی علی الصبح اس کی قوت میں کمی بتائی گئی ہے۔ اب یہ کیٹگری دو کا طوفان ہے۔

کیٹگری دو میں آنے کے باوجود فلورنس بدستور ایک خطرناک طوفان ہے کیونکہ یہ ایک وسیع ساحلی علاقے کو متاثر کرے گا۔ اس کے ساتھ شدید بارشوں کے علاوہ زوردار سمندری لہریں بھی ساحلوں سے ٹکرائیں گی۔ موسلادھار بارش سے کئی علاقے زیر آب آ سکتے ہیں۔ ان بارشوں اور سیلاب کو ماحولیاتی آفت بھی قرار دیا گیا ہے۔

فلورنس سمندری طوفان کے خطرے کے پیش نظر حکومت کی ہدایات پر سترہ لاکھ سے زائد افراد محفوظ مقامات کی جانب منتقل ہو گئے ہیں۔ ان کا تعلق ورجینیا، شمالی اور جنوبی کیرولینا ریاستوں سے ہے۔ ان کے علاوہ دس لاکھ افراد کو چوکس رکھا گیا ہے کہ وہ طوفان کے ٹکرانے کے بعد کی صورت حال سے نمٹنے کے لیے تیار رہیں۔

فلورنس طوفان سے متاثر ہونے والے علاقوں کے شہریوں نے خوراک، پانی اور پٹرول کا ذخیرہ کر رکھا ہے۔ اس کا خطرہ ہے کہ سمندری طوفان کے زوردار جھکڑوں سے بجلی کی فواہمی کئی ایام کے لیے منتقل ہو سکتی ہے۔

امریکی صدر ڈونلڈ ٹرمپ نے فلورنس کو ایک بڑا طوفان قرار دیا ہے۔ ٹرمپ نے وفاقی حکومت کو ہدایت کی ہے کہ وہ مقامی حکومتوں کی بھرپور امداد فراہم کرنے کے لیے تیار رہے۔ امریکی صدر نے اپنے شہریوں کو ہدایت کی ہے کہ وہ ہر ممکن طریقے سے محفوظ رہنے کی کوشش کریں۔