عجیب احتجاج، کیک منہ پر دے مارا

ہفتے کے دن بائیں بازو کی سیاسی جماعت کی پارلیمانی لیڈر زارا واگن کنیشٹ اپنی نششت پر براجمان تھیں کہ اچانک ایک شخص نے احتجاج کے طور پر ان کے منہ پر کیک دے مارا۔

جرمن شہر ماگدے برگ میں لنکے پارٹی کی ایک کانفرنس میں زارا کو جب اس طرح تشدد کا نشانہ بنایا گیا تو نہ صرف وہ بلکہ اس کانفرنس میں شریک دیگر شرکاء بھی پریشان ہو گئے۔

لنکے پارٹی کی رہنما زارا واگن کنیشٹ کا مؤقف ہے کہ جرمنی پہنچنے والے تمام مہاجرین کو پناہ نہیں دی جا سکتی ہے۔ ان کے اس مؤقف کو پہلے بھی تنقید کا نشانہ بنایا جا چکا ہے۔

بائیں بازو کے نظریات سے تعلق رکھنے والے ایک گروہ نے زارا کو براؤن چاکلیٹ کیک سے اس طرح نشانہ بنانے کی ذمہ داری قبول کر لی ہے۔ حملہ آور نے خود کو پارٹی کانفرنس میں شرکت کے لیے رجسٹر کرایا تھا۔

حملے کی ذمہ داری قبول کرنے والے بائیں بازو کے اس گروہ کے مطابق زارا کے خیالات انتہائی سخت گیر مؤقف کی پارٹی اے ایف ڈی کی دائیں بازو کی رہنما بیاٹرکس فان سٹورش سے ملتے ہیں۔

جب زارا واگن کنیشٹ کے منہ پر کیک مارا گیا تو ان کی پارٹی کے کئی ارکان ان کے گرد جمع ہو گئے۔ کئی نے تو ان کا کیک سے بھرا چہرہ چھپانے کی خاطر اپنی جیکٹیں بھی استعمال کیں۔

بعد ازاں لنکے پارٹی کے متعدد ارکان نے زارا واگن کنیشٹ کو کانفرنس ہال سے باہر لے جانے میں مدد بھی کی۔ اس دوران بھی ان کی کوشش تھی کہ اس خاتون سیاستدان کی تصاویر نہ بنائی جا سکیں۔

زارا واگن کنیشٹ سیاستدان ہونے کے علاوہ ایک انتہائی پرجوش مقررہ بھی ہیں۔ اس واقعے سے قبل بھی انہیں مہاجرین پر اپنے مؤقف کی بنا پر اپنی ہی پارٹی کے اندر بھی تنقید کا نشانہ بنایا جا چکا ہے۔