لیبیا: امریکی صدر کا کویت کے امیر کو فون

وائٹ ہاؤس کی طرف سے جاری کردہ بیان میں کہا گیا ہے کہ کویت کے امیر شیخ صباح الاحمد الصباح کو فون کرکے صدر اوباما نے کویت میں موجود امریکی فوجی دستوں کی حمایت پر بھی شکریہ ادا کیا۔

وائٹ ہاؤس کی طرف سے جاری کردہ بیان کے مطابق، ’صدر نے لیبیا کی عبوری قومی کونسل کے لیے کویت کی فراغ دلانہ قرار دیا۔‘

صدر اوباما کے مطابق ایسی مالی امداد سے قذافی مخالف طاقتوں کو اپنی فوری ضروریات پوری کرنے میں مدد ملے گی۔

کویت کی جانب سے گزشتہ ماہ لیبیا کے شہریوں کے لیے انسانی بنیادوں پر امداد کی اپیل کی گئی تھی۔ دریں اثناء جمعرات کے روز عالمی طاقتوں نے لیبیا کے رہنما معمر قذافی کے منجمد کیے گئے اثاثوں کو باغیوں کی ہنگامی ضروریات پوری کرنے کے لیے استعمال کرنے کا فیصلہ کیا تھا۔ قذافی حکومت کی طرف سے اس فیصلے کو ’’چوری‘‘ قرار دیا ہے۔

دوسری جانب لیبیا کے دارالحکومت طرابلس میں قبائلی رہنماؤں نے جمعے کے روز اپنے ایک اجلاس کے بعد حکومت مخالف مظاہرین اور باغیوں کے خلاف عام معافی کے قانون کا مطالبہ کیا ہے۔ اجلاس کے بعد جاری کیے گئے اعلامیے میں کہا گیا ہے کہ عام معافی کے قانون کے تحت حکومت مخالف تحریک میں شامل ہونے والوں اور اسلحہ اٹھانے والوں کو معافی دی جائے گی۔

اس اعلامیہ میں اس قانون کے حوالے سے کسی قسم کی تفصیل نہیں بتائی گئی ہے اور نہ ہی قانون کے رائج کرنے کے حوالے سے کسی ٹائم ٹیبل کا ذکر کیا گیا ہے۔ تاہم حکومتی ترجمان موسیٰ ابراہیم کے مطابق اس اجلاس میں ملک بھر سے قبائلی عمائدین جمع ہوئے۔ ابراہیم کا کہنا ہے کہ اجلاس میں شریک ان قبائلی عمائدین میں باغیوں کے زیرقبضہ علاقوں سے بھی نمائندے شریک ہوئے۔

رپورٹ : عاطف توقیر

ادارت : شامل شمس