لیبیا: مصراتہ کے ہوائی اڈّے پر باغی قابض

جمعرات کو لیبیا کے رہنما معمر قذافی کے خلاف برسرِ پیکار باغیوں نے اس وقت جشن منایا جب کئی ہفتوں کی لڑائی کے بعد لیبیا کا مشرقی بندرگاہی شہر مصراتہ کا ہوائی اڈّہ ان کے قبضے میں آ گیا۔ معمر قذافی کی فورسز کو شہر سے باہر نکلنا پڑا۔

مصراتہ لیبیا کا تیسرا بڑا شہر ہے جہاں سے تیل بھی نکالا جاتا ہے۔ کئی ہفتوں سے اس شہر کے کنٹرول کے لیے قذافی کی فوجوں اور باغیوں کے درمیان جنگ جاری تھی۔

بدھ کو باغی اس شہر پر مکمل طور پر قابض ہو گئے۔ لوگوں نے مصراتہ میں جشن منایا اور قذافی کی افواج کے چھوڑے گئے ٹینکوں کو نذرِ آتش کر دیا۔

مصراتہ کے ہوائی اڈّے پر باغیوں کا قبضہ انتہائی اہمیت کا حامل ہے۔ ہوائی اڈّے پر قذافی کی فورسز کے قبضے کی وجہ سے باغیوں کا دنیا سے رابطہ کٹ گیا تھا۔ باغیوں کے لیے بیرونی دنیا سےرابطہ اسلحے کی ترسیل کی وجہ سے بھی اہم ہے۔ خیال رہے کہ نیٹو قذافی کی افواج پر فضائی حملے کر رہی ہے جس سے باغیوں کو فائدہ پہنچ رہا ہے۔

انسانی حقوق کی تنظیموں نے مصراتہ میں شدید انسانی بحران کی نشاندہی کی ہے۔ مصراتہ میں پانچ لاکھ کے قریب افراد رہتے ہیں جو جنگ کے باعث غذائی قلّت اور طبّی سہولیات کے فقدان کے باعث پریشانی کا شکار ہیں۔

دریں اثناء برطانوی حکومت نے تصدیق کی ہے کہ لیبیا کے باغیوں کی کونسل کے اراکین جمعرات کو برطانوی وزیرِ اعظم ڈیوڈ کیمرون سے ملاقات کریں گے۔

واشنگٹن میں امریکی حکّام کا کہنا ہے کہ باغیوں کے لیے امدادی سامان کی پہلی کھیپ لیبیا کے مشرقی شہر بن غازی پہنچ چکی ہے۔

رپورٹ: شامل شمس⁄ خبر رساں ادارے

ادارت: ندیم گِل