لیبیا میں عراق جیسی غلطی نہ دہرائی جائے، اطالوی وزیر خارجہ

باغیوں نے دعوی کیا ہے کہ قذافی کے اہم شہر بنی ولید میں موجود قذافی کے حامیوں کے ساتھ ان کے مذاکرات کامیاب ہو گئے ہیں اور وہ آج بغیر کسی خون خرابے کے وہاں کا کنٹرول سنبھال لیں گے۔ لیبیا کی قومی عبوری کونسل نے کہا ہے کہ ان کے سپاہی آج بغیر کسی مزاحمت کا سامنا کیے قذافی کے حامیوں کے اہم شہر بنی ولید کا کنٹرول سنبھال لیں گے۔ باغیوں کے کمانڈر محمود عبدالعزیز نے خبر ایجنسی روئٹرز کو بتایا کہ سب کچھ گزشتہ روز طے پا گیا تھا اور قذافی کے حامیوں نے مزید کچھ گھنٹوں کی مہلت مانگی تھی۔ انہوں نے کہا بنی ولید میں شاید 100 مسلح جنگجو موجود ہیں۔

اسی طرح سرت اور صبا نامی شہروں کے محاذوں پر موجود باغیوں نے بھی کہا ہے کہ انہوں نے دونوں شہروں کو محاصرہ کر لیا ہے اور انہیں جیسے ہی حکم ملے گا وہ پیشقدمی شروع کر دیں گے۔ صحارا صحرا کے اس محاذ پر تعینات ایک باغی کمانڈر سلیمان نے بتایا ہے کہ قذافی کے حامی جنگجوؤں کے پاس فرار ہونے کا کوئی راستہ نہیں ہے۔

دوسری طرف اتوار کے دن اطالوی وزیر خارجہ فرانکو فراتینی نے عالمی برداری سے اپیل کی ہے کہ وہ ایک مستحکم لیبیا کو ممکن بنانے کے لیے وہاں کی نئی حکومت کو ہر ممکن مدد فراہم کرے تاکہ لیبیا کی نئی حکومت کو انتہا پسندوں کے ممکنہ حملوں سے بچایا جا سکے۔

فرانکو فراتینی نے لیبیا کی قومی عبوری کونسل کے رہنماؤں مصطفیٰ عبدالجیل اور محمود جبریل پر مکمل اعتماد کا اظہار کرتے ہوئے کہا کہ لیبیا کی نئی قیادت عوام کی ترقی کے لیے کام کرنے کی بھرپور صلاحیت رکھتی ہے۔ انہوں نے کہا دونوں رہنماؤں نے قذافی کی حمایت کافی عرصہ پہلے چھوڑ دی تھی، اس لیے ان کی نیت پر کوئی شک نہیں کیا جاسکتا ہے۔

تاہم فراتینی نے کہا کہ لیبیا میں معمر القذافی کو طاقت سے الگ کرنے کے بعد وہاں ویسی غلطی سے بچنا چاہیے جیسا کہ عراق میں صدام حسین کو اقتدار سے الگ کرنے کے بعد کی گئی تھی۔ سن 2003ء میں صدام حسین کا تختہ الٹنے کے بعد امریکی پالیسی کے مطابق صدام حسین کی سیاسی پارٹی کے تمام اہلکاروں کو عملی طور پر مرکزی سیاسی دھارے سے  الگ کر دیا گیا تھا۔ اس کے علاوہ عراقی فوج کی اعلیٰ قیادت کو بھی تحلیل کر دیا گیا تھا ، جس کے نتیجے میں عراقی باشندوں کی ایک بڑی تعداد بے یارومددگار ہو گئی تھی اور وہاں مقامی مسلح گروہوں نے طاقت حاصل کرنے کے لیے لڑائی شروع کر دی تھی۔

اطالوی وزیرخارجہ نے عراق کی مثال پیش کرتے ہوئے کہا کہ لیبیا میں بحالی اور تعمیر نو کے دوران یہ اہم ہو گا کہ عالمی برادری وہاں کی نئی حکومتی انتظامیہ کو اس طرح اپنے پیروں پر کھڑا ہونے میں مدد دے کہ وہاں شر پسند عناصر کو پنپنے کا کوئی موقع نہ ملے۔

دوسری طرف ہیومن رائٹس واچ نے اتوار کے دن ہی جاری کیے گئے اپنے بیان میں لیبیا کی نئی اتھارٹی پر زور دیا ہے کہ وہ افریقی تارکین وطن اور وہاں کے مقامی سیاہ فام باشندوں کی گرفتاریوں کے عمل کو روک دے۔ گزشتہ ہفتے کے دوران باغیوں نے طرابلس اور اس کے نواح سے ایسے سینکڑوں افراد کو گرفتار کر کے عارضی جیل خانوں میں ڈال دیا، جن پر الزام عائد کیا جاتا ہےکہ وہ کرائے کے گوریلے ہیں اور قذافی نے لڑائی کے لیے خصوصی طور پر چاڈ، سوڈان، نائجر اور مالی جیسے ممالک سے بلوائے تھے۔

کہا جاتا ہے کہ باغیوں کے خلاف مسلح لڑائی کے لیے قذافی نے کئی افریقی ممالک سے کرائے کے جنگجو بلوائے تھے تاہم باغیوں کی زیر حراست کئی افراد نے انکار کیا ہے کہ وہ قذافی کے لیے لڑ رہے تھے۔ ان کے بقول انہیں صرف ان کی رنگت اور نسل کی وجہ سے گرفتار کیا گیا ہے۔

رپورٹ: عاطف بلوچ

ادارت: عابد حسین