مصنوعی ذہانت کے لیے ایک نیا سال

مصنوعی ذہانت آئندہ برس کہاں تک پہنچنے والی ہے؟ اس بارے میں کوئی واضح بات نہیں کی جا سکتی۔ فقط یہی کچھ کہا جا سکتا ہے کہ اب مشینوں کو کام کے لیے انسانوں کی ضرورت نہیں ہوتی اور مستقبل میں اسی طرح کی مشینیں ہمارے سامنے آتی جائیں گی۔ اس کی وجہ اسمارٹ اسپیکرز اور مصنوعی ذہانت کے حامل صوتی معاونت سے چلنے والے آلات بھی ہیں۔ کرسمس کے موقع پر آپ کو ایمازون ایکو ڈاٹ کے اشتہارات ضرور دکھائی دیے ہوں گے۔ صوتی معاونت سے چلنے والے یہ مصنوعی ذہانت کے حامل آلات کی ایک مثال ہے، جو اب عام صارفین کو دستیاب ہیں۔ آپ اس آلے کو ’’الیکسا‘‘ کہہ کر مخاطب کرتے ہیں، سو آپ کہتے ہیں، ’’الیکسا کرسمس بتیاں جلا دیجیے‘‘ اور ’الیکسا‘ خودکار طریقے سے آپ کا حکم بجا لاتی ہے۔

مہاجرین ایپ استعمال کریں، پیسے کمائیں

آٹھویں سیارے کی دریافت میں ناسا نے مصنوعی ذہانت استعمال کی

مگر کمپیوٹروں کو مبہم منطق سمجھ نہیں آتی۔ یہ بائنری نظام کے حامل ہوتے ہیں اور گفت گو کے دوران عام حالات میں ’’ہممم‘‘اور  ’’آآآ‘ جیسے معاملات ان کی سمجھ سے باہر ہیں یا آپ ان سے گفت گو میں زیادہ وقت نہیں لے سکتے۔ انہیں واضح اور دو ٹوک انداز کی ہدایات کی ضرورت ہوتی ہے۔

مستقبل میں آپ کو اور بھی زیادہ آلات دکھائی دیں گے، جو اسی انداز سے کام کیا کریں گے۔ آپ ایمازون کے مداح ہیں، یا گوگل، ایپل، سام سنگ، بائیڈو، مائیکروسافٹ یا ڈِنگ ڈانگ کو فوقیت دیتے ہیں، یہ آلات جلد ہی آپ کے گھروں کا لازمی حصہ بننے والے ہیں۔

نومبر میں جرمن حکومت نے بھی ایک نیا پالیسی پیپر شائع کیا ہے، جس میں سب سے زیادہ ترجیح ’میڈ اِن جرمنی مصنوعی ذہانت‘ کو دی گئی ہے اور سن 2019ء میں اسے ایک بین الاقوامی برانڈ کی طرح پیش کیا جائے گا۔ دو برس قبل برطانیہ بھی اس سلسلے میں اپنی پالیسی دے چکا ہے۔

سوال یہ ہے کہ مصنوعی ذہانت کے بعد ہماری زندگی کیا ہو گی؟ ماضی میں ہم چاہتے تھے کہ دنیا کے سارے کام ہماری انگلیوں کے اشاروں پر ہونے لگیں، مگر اب حالت یہ ہے کہ ہم انگلی سے بٹن تک دبانا نہیں چاہتے اور معاملہ صوتی معاون کے سپرد کر دیا ہے۔

یونیورسٹی آف ویروِک کے سائنس دان اب سینتھیٹک بائیولوجی کے شعبے میں تحقیق کر رہے ہیں۔ وہ چاہتے ہیں کہ جگنو کے جین کا استعمال کر کے ایسے کرسمس درخت پیدا کیے جائیں، جو خود ہی روشن ہو جایا کریں۔ جگنو اپنے جسم کو ایک کیمیائی تعامل کے ذریعے روشن کرتے ہیں، جسے بائیولیومینینس کہتے ہیں۔ سائنس دان اس کے ذریعے ایک سینتھیٹک ڈی این اے تیار کرنا چاہتے ہیں، جو ان کرسمس ٹریز میں منتقل کیا جائے گا اور پھر فطرت کا ’باڈی کلاک‘ باقی کام خود دیکھ لے گا، یعنی جوں ہی اندھیرا ہو گا، یہ درخت خود ہی روشن ہو جایا کریں گے۔ یعنی کچھ عرصے بعد آپ کو ’الیکسا‘ کو بھی نہیں کہنا پڑے گا کہ بتیاں جلا دو۔

اسی طرح مصنوعی ذہانت کی حامل گاڑیاں جلد ہی سڑکوں پر دکھائی دیں گی، جو خود چلا کریں گی۔ تاہم ناقدین کا یہ بھی کہنا ہے کہ مشینوں پر اس انداز سے بڑھتا انحصار انسانی فکری استعداد اور استطاعت کو نقصان پہنچا سکتا ہے۔ لیکن لگتا یوں ہے کہ اس انحصار کو کم کرنا اب خود انسان کے اپنے بس میں بھی نہیں رہا۔

ذوالفقار ابانی، ع ت، الف ب الف