معائنہ کاروں کا شام کا دوسرا مشن شروع

اُدھر بڑی طاقتیں اقوام متحدہ کی جنرل اسمبلی کے اجلاس میں شام کے بحران سے متعلق ایک قرار داد کے معاہدے کے کافی نزدیک پہنچ گئی ہیں۔ مزید تفصیلات کے ساتھ کشور مصطفیٰ:

شامی صدر بشارالاسد کا یہ انٹرویو بُدھ کو وینزویلا کے ٹیلی وژن ’ٹیلیسور‘ سے نشر ہوا ہے۔ اپنے بیان میں اسد نے کہا،" مجھے اپنے کیمیاوی ہتھیاروں کو ترک کرنے سے متعلق معاہدے کی راہ میں کوئی رکاوٹ نظر نہیں آ رہی ہے" ۔ اسد کا یہ بیان ایک ایسے وقت میں سامنے آیا ہے جب اقوام متحدہ کے معائنہ کار دمشق پہنچ گئے ہیں جہاں وہ 14 واقعات میں مبینہ طور پر کیمیاوی ہتھیاروں کے استعمال کے بارے میں دوبارہ چھان بین کا عمل شروع کریں گے۔

شامی صدر اسد نے ’ٹیلیسور‘ کو انٹرویو دیتے ہوئے کہا تھا کہ اُن کی حکومت کیمیاوی ہتھیاروں کے کنونشن کے اُس معاہدے کے ایک فریق کے طور پر دستخط کر چُکی ہے جو روس اور امریکا نے شامی کیمیاوی ہتھیاروں کو تباہ کرنے کی ڈیل کے طور پر تیار کیا ہے۔ اُن کا کہنا تھا،" شام ہر اُس معاہدے کی پابندی کرتا ہے جس پر دمشق حکومت دستخط کرتی ہے" ۔ بشارالاسد کا وینزویلا کے ٹیلی وژن کو دیا گیا یہ انٹرویو شام کی سرکاری نیوز ایجنسی سانا نے ریلیز کیا ہے۔ اسد نے اپنے انٹرویو میں مزید کہا تھا کہ دمشق حکومت نے کیمیاوی ہتھیاروں کی ممانعت کے ادارے OPCW کو مطلوبہ تفصیلات بھیجنے شروع کر دی ہیں۔ شام کے صدر نے ایک بار پھر اس امر کا امکان ظاہر کیا ہے کہ باغی کیمیاوی ہتھیاروں کے معائنہ کاروں کو چند مقامات تک پہنچنے نہیں دیں گے۔

دریں اثناء دمشق سے ملنے والی تازہ ترین اطلاعات کے مطابق اقوام متحدہ کے کیمیاوی ہتھیاروں کے ماہرین کی ایک ٹیم دمشق کے ایک ہوٹل سے نکل چُکی ہے اور اُن مقامات کی طرف بڑھ رہی ہے جہاں کیمیاوی ہتھیاروں کے مبینہ ستعمال کے بارے میں چھان بین کی جائے گی۔ اس بارے میں خبر رساں ادارے اے ایف پی نے آج جمعرات کی سہ پہر تین موٹر گاڑیوں پر مشتمل ایک ٹیم کی روانگی کی اطلاع دی تاہم یہ نہیں بتایا گیا ہے کہ یہ معائنہ کار کس علاقے کی طرف گئے ہیں۔ ایکسپرٹس کی یہ ٹیم گزشتہ روز یعنی بُدھ کو دمشق پہنچی تھی۔ یہ ان کا شام میں معائنہ کاری کا دوسرا مشن ہے۔ پہلی بار یہ ٹیم 21 اگست کو پہنچی تھی اور اس نے شامی دارالحکومت دمشق کے اُن مضافاتی علاقوں کا دورہ کیا تھا جہاں مبینہ طور پر کیمیاوی ہتھیار استعمال کیے گئے تھے۔