معروف صحافی نجم سیٹھی پنجاب کے نگران وزیراعلٰی نامزد

یاد رہے کہ پاکستان میں جمہوری حکومت کے پانچ سال مکمل ہونے کے بعد وہاں مرکز اور تین صوبوں میں پہلے ہی نگران حکومتوں کا قیام عمل میں آ چکا ہے۔ سب سے بڑی آبادی والے صوبے پنجاب میں قائم مقام وزیراعلٰی کے انتخاب کے لیے مشاورت کئی روز سے جاری تھی، جس کے بعد پارلیمانی کمیٹی نے متفقہ طور پر پنجاب کی اپوزیشن جماعتوں کی جانب سے نامزد کردہ معروف صحافی نجم سیٹھی کے نام پر اتفاق کر لیا۔

پنجاب میں قائم مقام وزیراعلٰی کی نامزدگی کے لیے قائم کی گئی پارلیمانی کمیٹی میں اپوزیشن کی نمائندگی میجر (ر) ذوالفقار گوندل، شوکت بسرا اور مسلم لیگ (ق) کے چوہدری ظہیر کر رہے تھے جب کہ مسلم لیگ (ن) کی جانب سے رانا ثنااللہ، مجتبٰی شجاع الرحمان اور اقبال چنڑ شریک تھے۔

پنجاب کے نگراں وزیر اعلیٰ کے انتخاب کے لئےپاکستان مسلم لیگ اور پاکستان پیپلز پارٹی کی جانب سے جسٹس (ر) زاہد حسین اور معروف صحافی نجم سیٹھی کے نام پیش کیے گئے جب کہ مسلم لیگ (ن) کی جانب سے خواجہ ظہیر احمد اور جسٹس (ر) عامر رضا کے نام تجویز کیے گئے تھے۔

آئین کے مطابق منگل کو پارلیمانی کمیٹی کا نگران وزیراعلٰی کی نامزدگی کا استحقاق ختم ہو رہا تھا لہذا نگراں وزیراعلیٰ کے تقرر کے لیے پارلیمانی کمیٹی کا اجلاس کئی گھنٹے جاری رہا، جس کے بعد ن لیگ اور اپوزیشن کی چھ رکنی پارلیمانی کمیٹی نے پنجاب کے نگراں وزیر اعلیٰ کے لئے پیپلز پارٹی کے نامزد کردہ نجم سیٹھی کے نام پر اتفاق کرلیا۔ جس کا باقاعدہ اعلان کمیٹی کے اجلاس کے اختتام پر کیا گیا۔

پنجاب کی وزارت اعلٰی کے لیے نامزد ہونے والے نجم سیٹھی ایک معروف صحافی اور سیاسی تجزیہ کار ہیں۔ وہ 1948ء میں پیدا ہوئے اور لاہور کے گورنمنٹ کالج سے گریجویشن کی اور کیمبرج یونیورسٹی سے معاشیات میں ماسٹرز کی ڈگری حاصل کی۔ نجم سیٹھی اس سے پہلے بھی نگران وفاقی وزیر رہ چکے ہیں جب کہ ان کی اہلیہ جگنو محسن بھی معروف سماجی کارکن ہیں۔

رپورٹ: زبیر بشیر

ادارت:عاطف توقیر