مغربی یورپ میں طوفان کی تباہ کاریاں

جمعرات کے دن مغربی یورپ میں طوفان کے نتیجے میں جرمنی اور ہالینڈ سب سے زیادہ متاثر ہوئے، جہاں روزگار زندگی مفلوج ہو کر رہ گیا۔ جرمن شہر مندن میں تیز ہواؤں کے نتیجے میں کئی مکانات کی چھتیں تک اڑ گئیں۔

فریڈرک نامی اس طوفان کے نتیجے میں کئی مقامات پر چلنے والی تیز ہواؤں کی رفتار دو سو کلو میٹر فی گھنٹہ بھی ریکارڈ کی گئی، جس کی وجہ سے کئی درخت بھی زمین سے اکھڑ گئے۔ جمعرات کے دن مغربی جرمنی میں ایسے کئی واقعات رونما ہوئے۔

جرمنی میں ایسا شدید طوفان گیارہ برس بعد ریکارڈ کیا گیا ہے۔ جرمن شہر ڈوئسبرگ بھی اس قدرتی آفت سے نہ بچا، جہاں بڑے بڑے ٹرک بھی تیز وتند ہواؤں کی تاب نہ لا سکے۔

جرمن حکام نے بتایا ہے کہ اس طوفان کے بعد جمعے کے دن سے امدادی کاموں میں تیزی پیدا کر دی گئی۔ بتایا گیا ہے کہ امدادی ادارے سڑکوں اور رہائشی علاقوں میں گرنے والے درختوں اور عمارتوں کے ملبے کو ہٹانے کام جاری رکھے ہوئے ہیں۔

اس طوفان کی وجہ سے ہونے والی بارش اور تیز ہوائیں کئی حادثات کا باعث بھی بنیں۔ جرمن شہر بون کی ایک موٹر وے پر الٹے ہوئے ٹرکوں کی تصاویر سے ظاہر ہوتا ہے کہ اس طوفان کی شدت کتنی زیادہ تھی۔

اس طوفان نے جرمنی کے ہمسایہ ملک ہالینڈ کو بھی اپنی لپیٹ میں لیا۔ ہالینڈ کے شہر ایمسٹرڈیم میں بھی کئی مقامات پر درخت گرے اور عمارتوں کو نقصان پہنچا۔

تیز ہواؤں کی وجہ سے جرمنی اور ہالینڈ کی شاہراہوں پر نصب کئی ٹریفک سائنز بھی زمیں بوس ہو گئے۔ امدادی ورکرز جمعے کے دن ان شاہراہوں پر گرنے والے ملبے کو ہٹانے میں مصروف ہیں۔

’فریڈرک‘ نامی اس طوفان کے سبب صرف جرمنی میں ہونے والی والی ہلاکتوں کی تعداد آٹھ تک پہنچ چکی ہے۔

فریڈرک کی ممکنہ تباہی کی وجہ سے مغربی یورپی ممالک میں پہلے سے ہی انتباہی پیغامات جاری کر دیے گئے تھے۔ جرمن شہر ایلپن وین میں تیز ہواؤں کی وجہ سے زمین بھی اکھڑ گئی۔

ڈوئچے بان نے اپنی تمام تیز رفتار ٹرینیں فریڈرک طوفان کے سبب چلنے والی تیز ہواؤں کے باعث جمعرات کے روز روک دی تھیں۔ 2007ء کے بعد یہ سب سے بڑی معطلی تھی۔ اب امید کی جا رہی ہے کہ اختتام ہفتہ پر تمام ٹرینیں اپنے معمول کے مطابق چلنے لگیں گی۔

جرمنی کی سب سے گنجان آباد ریاست نارتھ رائن ویسٹ فیلیا میں تیز رفتار ریل گاڑیوں کے علاوہ علاقائی ٹرین سروس آج جمعے کے روز بھی تعطل کا شکار ہے۔