ممبئی زیر آب، پندرہ افراد ہلاک

بھارتی شہر ممبئی میں مون سون کی بارشوں کے باعث ایک دیوار گرنے سے کم از کم پندرہ افراد ہلاک ہو گئے۔ مقامی حکام کے مطابق دیوار گرنے سے تقریبا ستر افراد زخمی بھی ہوئے ہیں۔

ممبئی کے دیگر علاقوں میں بارش کے باعث تین مزید افراد کی ہلاکتوں کی اطلاع ہے جبکہ خراب موسم کے باعث مزید ہلاکتوں کا خدشہ بھی ہے۔

مقامی انتظامیہ نے عام تعطیل کا اعلان کرتے ہوئے لوگوں سے گھروں پر رہنے کی اپیل کی ہے۔ اسکولوں اور کالجوں کو بند رکھا گیا ہے جبکہ ایک سو سے زائد پروازیں منسوخ کر دی گئی ہیں۔

ممبئی میں محکمہ موسمیات کے مطابق گزشتہ ایک دہائی میں سب سے زیادہ بارش گزشتہ دو دنوں میں ریکارڈ کی گئی۔

ٹی وی چینلز پر دکھایا گیا کہ گاڑیاں پانی میں ڈوبی ہوئی ہیں اور عمارتوں میں پانی گھس گیا ہے۔

بھارت میں جون سے ستمبر کے دوران مون سون بارشیں ہر سال تباہی کا باعث بنتی ہیں۔ کئی عمارتیں اپنی کمزور بنیادوں کے باعث گر جاتی ہیں۔ کئی علاقے سیلابی پانی سے زیر آب آ جاتے ہیں۔