نئے آرمی چیف کی تعیناتی کا مشکل مرحلہ

گزشتہ شب فوج کے شعبہ تعلقات عامہ کی ایک پریس ریلیز میں اس امر کا انکشاف کیا گیا کہ فوج کے نئے سربراہ کی تقرری سے متعلق جی ایچ کیو کی ایک سمری وزیر اعظم کے دفتر پہنچا دی گئی اور اس طرح پاکستانی فوج کے نئے چیف کا انتخاب اور اس کا اعلان وزیر اعظم شہباز شریف نے کرنا ہے۔ اس فہرست میں فوج کے چھ سینئر ترین اہلکاروں کے نام شامل ہیں۔ موجوہ چیف آف آرمی اسٹاف جنرل باجوہ 29 نومبر کو عہدہ برا ہو جائیں گے۔ جنرل باجوہ 2016 ء سے 2019 ء تک اس عہدے پر فائض رہے اور 2019 ء میں ان کے عہدے کے میعاد میں توسیع کر دی گئی تھی۔

دریں اثناء پاکستان کے وزیر دفاع خواجہ محمد آصف نے بُدھ کو ایک ٹویٹ پیغام میں اس امر کی تصدیق کرتے ہوئے تحریر کیا کہ حکومت کو فوج کی طرف سے سمری موصول ہو گئی ہے۔ اس فہرست میں ٹاپ کے چھ جرنیلوں کے نام شامل ہیں، جو زیر غور ہیں اور وہ وزیر اعظم کیساتھ بُدھ کو اس بارے میں بات چیت کر رہے ہیں۔

اس اقدام سے شہباز شریف کی مخلوط حکومت اور پاکستانیفوجکے مابین جنرل باجوہ کے عہدے کی تبدیلی کے ضمن میں پائے جانے والے '' ڈیڈلاک‘‘ سے متعلق کی جانے والی تمام تر قیاس آرائیاں بھی ختم ہوگئی ہیں۔

ناموں کی فہرست

وزیر اعظم کے دفتر پہنچنے والی سمری میں سینیئر ترین چھ لیفٹیننٹ جنرلز کے نام شامل ہیں۔  لیفٹیننٹ جنرل عاصم منیر، لیفٹیننٹ جنرل ساحر شمشاد مرزا، لیفٹیننٹ جنرل اظہر عباس، لیفٹیننٹ جنرل نعمان محمود، لیفٹیننٹ جنرل فیض حمید اور لیفٹیننٹ جنرل محمد عامر کے نام اسی ترتیب سے اُس فہرست میں شامل ہیں، جو وزیراعظم آفس کو موصول ہوئی ہے۔

شریف حکومت کو درپیش چیلنجز

اپریل کے ماہ میں سابق وزیر اعظم اور ملک کے پاپولر سیاسی لیڈر عمران خان کو پارلیمان میں عدم اعتماد کے ووٹ کیساتھ اقتدار سے ہٹا کر وزارت عظمیٰ کے عہدے پر فائز ہونے والے شہباز شریف کو گوناگوں مسائل کا سامنا ہے۔ خان کی طرف سے یہ الزام  عائد کیا گیا کہ ان حکومت کا خاتمہ امریکہ کی پاکستانی فوج کیساتھ ایک سازش کے نتیجے میں ہوا۔

 واشنگٹن اور پاکستانی فوج کی طرف سے اس الزام کی تردید کردی گئی تاہم شہباز شریف کی حکومت پر غیرمعمولی دباؤ رہا اور اب تک فوج اور شریف حکومت کے تعلقات پر تنقید اور عمران خان کے خلاف موجودہ حکومت اور فوج کے مبینہ گٹھ جوڑ پر بھی بہت سے حلقوں کی طرف سے اُٹھنے والے سوالات نے شہباز شریف کو مشکل میں ڈالا ہوا ہے۔ دوسری جانب پاکستانی عوام میں فوج کی کم ہوتی مقبولیت اور اس کی ساکھ کو پہچنے والے نقصانات کے اثراتشریف کی مخلوط حکومت پر بھی پڑے ہیں۔

وفاقی حکومت اس وقت کئی اطراف سے دباؤ کا شکار ہے۔ اس میں گزشتہ موسم گرما کے تباہ کُن سیلاب کی تباہ کاریوں سے نمٹنا بھی شامل ہے۔ اب موسم سرما سے پہلے پہلے بے گھر ہونے والے ہزاروں افراد کے لیے رہائش، خوراک اور حفظان صحت کا مناسب بندوبست کرنا ہو گا۔ توانائی کے بحران کے سبب ملک میں بڑھتی ہوئی مہنگائی سے پریشان حال عوام کے مسائل بھی بہت زیادہ بڑھ چکے ہیں۔

 حکومت اتنے زیادہ چیلنجز سے نمٹنے کی کوشش تو کر رہی ہے تاہم اس میں کس حد تک کامیاب ہو پائے گی یہ ایک کھلا سوال ہے۔ یاد رہے کہ حالیہ سیلاب کی تباہی کے شکار 33 ملین افراد اپنے بقا کی جنگ لڑ رہے ہیں۔ ایک ہزار سات سو چالیس کے قریب اموات کا سرکاری طور پر اندراج  کیا گیا جبکہ موسمی خرابی اور سیلاب کے سبب ہلاکتوں کی تعداد یقیناً اس سے کہیں زیادہ ہو گی۔

عمران خان کا مارچ

28 اکتوبر کو پاکستان کے مشرقی شہر لاہور سے شروع ہونے والا پی ٹی آئی کا مارچ ملکی سیاست اور موجودہ حکومت کے لیے درد سر بنا ہوا ہے۔ عمران خان کی عوامی مقبولیت میں اُس وقت غیر معمولی اضافہ ہوا، جب  ان پر آزادیمارچ کے دوران ایک قاتلانہ حملہ ہوا، جس میں وہ بال بال بچ گئے۔ اس واقعے میں ایک  شہری کی جان بھی گئی اور کئی دیگر افراد زخمی بھی ہوئے تھے۔

اس کے بعد سے عمران خان کا احتجاجی مارچ اسلام آباد کی طرف بڑھ رہا ہے۔ امید کی جا رہی ہے کہ خان جلد دوبارہ مارچ کی قیادت کریں گے۔ اب انہوں نے 26 نومبر کو راوالپنڈی میں جلسے کی کال دی ہے۔

کیا پاکستان قبل از وقت انتخابات کی طرف بڑھ رہا ہے؟

ان تمام باتوں کا اثر اس وقت پاکستان کی موجودہ حکومت پر پڑ رہا ہے۔ وہ سخت دباؤ میں ہے۔ فوج کے نئے سربراہ کے لیے بھی آنے والے دنوں میں بڑے چیلنجز کی نشاندہی ہو رہی ہے۔

ک م / ا ا ( اے ایف پی)