وزیر اعظم مودی اور سعودی ولی عہد محمد بن سلمان کی ملاقات

سعودی عرب کے عملاً حکمران ولی عہد محمد بن سلمان نےبھارت کے تین روزہ سرکاری دورے کے آخری دن آج 11ستمبر کوبھارتی وزیر اعظم نریندر مودی سے تفصیلی تبادلہ خیال کیا۔ محمد بن سلمان کل ختم ہونے والے جی 20سربراہی کانفرنس میں شرکت کے لیے ہفتے کے روز دہلی پہنچے تھے۔

حکومتی ذرائع کے مطابق دونوں رہنماوں نے اسٹریٹیجک پارٹنر شپ کونسل کی پہلی میٹنگ کی مشترکہ صدارت کی۔ اس کونسل کا قیام سن 2019 میں ریاض میں دونوں ملکوں کے درمیان ایک معاہدے کے بعد عمل میں آیا تھا۔

ذرائع نے بتایا کہ وزیر اعظم مودی اور ولی عہد محمد بن سلمان نے سیاسی، سماجی، ثقافتی، اقتصادی اور سرمایہ کاری میں تعاون سے متعلق کمیٹیوں کی پیش رفت کا جائزہ لیا۔ انہوں نے سلامتی، دفاع، تجارت، معیشت، ثقافت، سیاست اور دونوں ملکوں کے عوام کے مابین باہم تعلقات کو فروغ دینے کے مختلف پہلوؤں پر بھی تبادلہ خیال کیا۔

سعودی ولی عہد محمد بن سلمان کے دورہ بھارت کا ایجنڈہ کیا ہے؟

دونوں رہنماؤں نے باہمی مفاد کے علاقائی اور بین الاقوامی امور پر بھی بات چیت کی۔

بھارت اور سعودی عرب کے درمیان بڑھتی ہوئی قربت

بھارت اور سعودی عرب کے درمیان حالیہ برسوں میں باہمی قربت میں کافی اضافہ ہوا ہے۔ جی ٹوئنٹی اجلاس کی اس تصویرکے بھی متعدد معنی نکالے جارہے ہیں جس میں اسٹیج پر محمد بن سلمان اور امریکی صدر جو بائیڈن کے درمیان مصافحہ کے وقت مودی ان کا ہاتھ تھامتے ہوئے دکھائی دے رہے ہیں۔

سفارتی تجزیہ کاروں کا کہنا ہے کہ دونوں رہنماؤں کے درمیان بڑھتی ہوئی قربت حالیہ برسوں میں کئی عالمی فورمز پر بھی دکھائی دی۔ان کا کہنا ہے کہ چونکہ سعودی عرب کو اسلامی ملکوں میں نمایاں مقام حاصل ہے اس لیے وزیر اعظم مودی نے اس کے ساتھ قربت بڑھا کر پاکستان کو کنارے کرنے کی بڑی حد تک کامیاب کوشش کی ہے۔

خیال رہے کہ محمد بن سلمان کے پروگرام میں اس مرتبہ پاکستان شامل نہیں ہے حالانکہ سعودی رہنما جب بھارت کے دورے پر آتے ہیں تو اس سے پہلے یا بعد میں پاکستان کا بھی دورہ کرتے رہے ہیں۔

باہمی تجارت میں ریکارڈ اضافہ

حکومت کی طرف سے جاری کردہ اعدادو شمار کے مطابق بھارت اور سعودی عرب کے درمیان مالی سال 2022-2023 میں 52.75بلین ڈالر کی تجارت ہوئی جو کہ ایک ریکارڈ ہے۔

باہمی تعلقات میں اضافے میں تیزی سن 2019میں مودی کے ریاض دورے کے بعد دیکھنے کو ملی ہے۔ اس دورے کے دوران دونوں ملکوں نے دفاعی تعاون پر ایک مشترکہ کمیٹی بھی قائم کی تھی جس کی میٹنگیں مستقل ہوتی رہتی ہیں۔ دونوں ملکوں نے دفاع او ر سکیورٹی کے شعبوں میں تعاون کے متعدد شعبوں کی نشاندہی کی ہے۔

بھارت اس وقت سعودی عرب کا دوسرا سب سے بڑا تجارتی پارٹنر ہے جب کہ سعودی عرب بھارت کا چوتھا سب سے بڑا تجارتی شراکت دار ہے۔

نئی دہلی میں سعودی سفیر صالح عید الحسینی نے میڈیا سے بات کرتے ہوئے بتایا کہ سن 2021کے مقابلے گزشتہ برس باہمی تجارت میں 50فیصد کا اضافہ ہوا ہے۔ انہوں نے کہا کہ سعودی عرب اور بھارت مختلف اسٹریٹیجک اشیاء اور خدمات کے شعبوں میں ایک دوسرے پر انحصار کرتے ہیں۔

نیا تجارتی کوریڈور

جی 20  سمٹ کے دوران وزیر اعظم مودی نے 'انڈیا۔ مڈل ایسٹ۔ یورپ اکنامک کوریڈور' کے جس منصوبے کا اعلان کیا اس میں سعودی عرب کا بھی اہم کردار ہوگا۔

جی ٹوئنٹی سربراہی اجلاس میں مشترکہ اعلامیے کے اجرا پر اتفاق

محمد بن سلمان نے اس پروجیکٹ پر اپنی رائے کا اظہار کرتے ہوئے کہا،"ہم اس اقدام اور اقتصادی راہداری منصوبے پر عمل درآمدکے منتظر ہیں جس کا اعلان اس میٹنگ میں کیا گیا ہے۔ میں ان لوگوں کا شکریہ ادا کرنا چاہوں گا جنہوں نے اس اہم اقتصادی راہداری کے قیام کے اس کے ابتدائی مرحلے تک پہنچنے کے لیے ہمارے ساتھ کام کیا۔"

سعودی عرب کا بھارتی شہریوں کے لیے بڑا اعلان، ویزا کا حصول آسان

اس منصوبے کے تحت مشرق وسطی میں واقع ممالک کو ریل نیٹ ورک کے ذریعے جوڑا جائے گا اور بعد میں مشرق وسطیٰ انڈیا کے ساتھ بحری راستوں کے ذریعے جڑے گا۔ اس منصوبے کی تکمیل کے بعد سامان دبئی سے اسرائیل کی حیفہ بندرگاہ تک ٹرین کے ذریعے جا سکے گا اور اس کے بعد میں آسانی سے یورپ میں داخل ہو سکے گا۔

ماہرین کا خیال ہے کہ اگر یہ منصوبہ مکمل ہوجاتا ہے تو یہ چین کے' بیلٹ اینڈ روڈ پروجیکٹ' کا متباد ل ثابت ہوسکتا ہے۔ اس کے ذریعہ بھارت نہ صرف چین کوچیلنج کرسکتا ہے بلکہ 'گلوبل ساوتھ' کا لیڈر بھی بن سکتا ہے۔