ویتنام میں اربوں ڈالر کے ہائی اسپیڈ ریلوے منصوبے کی منظوری

ویتنامی حکومت کا کہنا ہے کہ اس ہائی اسپیڈ ریلوے منصوبے کے ذریعے نہ صرف ملکی معیشت کو فروغ ملے گا بلکہ ویتنام کی عالمی ساکھ میں بھی بہتری آئے گی، جو غیرملکی سرمایہ کاروں کو ملک میں سرمایہ کاری کی طرف راغب کرے گی۔

ریلوے لائن منصوبہ ہے کیا؟

پارلیمنٹ کی ویب سائٹ پر جاری کردہ بیان کے مطابق قومی اسمبلی نے ملک کے شمالی اور جنوبی حصے کو جوڑنے والے مرکزی راستے پر ہائی اسپیڈ ریلوے منصوبے کے لیے سرمایہ کاری کی پالیسیوں پر ایک قرارداد کی منظوری دی ہے۔ یہ 1500 کلومیٹر طویل ریلوے لائن شمال میں دارالحکومت ہنوئی سے لےکر جنوب میں واقع تجارتی مرکز اور ملک کے سب سے بڑے شہر ہوچی من، جو پہلے سائیگون کے نام سے جانا جاتا تھا، تک بچھائے جائے گی۔

ریلوے لائن کی تعمیر کا آغاز 2027ء میں متوقع ہے جبکہ منصوبے کی تکمیل کے بعد 2035ء تک ٹرینوں کی آمد و رفت کا باقاعدہ آغاز ہوجائے گا۔ تاہم ویتنام کو ماضی میں بھی اپنے تعمیراتی منصوبوں کی تکمیل میں تاخیر کا سامنا رہا ہے۔ اس ریلوے ٹریک کا 60 فیصد حصہ پلوں پر تعمیر کیا جائے گا، 10 فیصد حصہ سرنگوں سے گزرے گا اور باقی 30 فیصد حصہ زمین پر بنایا جائے گا۔ تاہم منصوبے کے لیے فنڈز کی تفصیلات ابھی تک غیر واضح ہیں۔

یہ ریلوے لائن 20 مختلف صوبوں اور شہروں سے گزرے گی۔ اس راستے پر 23 مسافر اسٹیشن اور پانچ مال برداری اسٹیشن ہوں گے۔ اس ریلوے لائن کا مقصد نہ صرف عوام کو سفری سہولیات کی فراہمی ہے بلکہ یہ مختلف اشیاء، بشمول دفاعی ساز و سامان، کی ایک جگہ سے دوسری جگہ منتقلی کے لیے بھی استعمال کی جائے گی۔

شمال جنوب کوریڈور پراجیکٹ کی ضرورت

اس منصوبے کے سبب ٹرین کے سفر کا وقت 30 گھنٹوں سے کم ہو کر صرف پانچ گھنٹے رہ جائے گا۔ نائب وزیر برائے ٹرانسپورٹ ننگوین زنگ ہوئی کا کہنا ہے کہ مختلف مطالعات سے یہ ثابت ہوا ہے کہ ملک کے شمالی اور جنوبی حصوں کے درمیان سفر کے لیے موجودہ ذرائع ناکافی ہیں، اور وہاں نقل و حمل کے تیز رفتار نظام کی ضرورت ہے۔ ان کے مطابق یہ منصوبہ ٹرانسپورٹ کے نظام کو موثر بنانے میں اہم کردار ادا کرے گا اور ویتنام کی ترقی کے نئے دور میں قدم رکھنے کے لیے ایک سنگ میل ثابت ہوگا۔

ح ف / ش ر (اے پی، اے ایف پی، ڈی پی اے)