بائیڈن کا دورہ وسکونسن، متاثرہ سیاہ فام شخص سے ملاقات

امریکا میں ڈیموکریٹک پارٹی کے صدارتی امیدوار جو بائیڈن نے صدر ٹرمپ کے دورے کے دو روز بعد ریاست وسکونسن کے شہر کینوشا کا دورہ کیا اور چند روز قبل پولیس کی فائرنگ میں شدید طور پر زخمی ہونے والے سیاہ فام شخص جیکب بلیک کے اہل خانہ سے ایک گھنٹے تک ملاقات کی۔ اس موقع پر انہوں نے ایک مقامی چرچ کابھی دورہ کیا اور وہاں موجود کمیونٹی رہنماؤں سے خطاب کرتے ہوئے امریکا میں غلامی کی تاریخ پر باتیں کیں۔

امریکا کے سابق نائب صدر نے جیکب بلیک، جن پر پولیس نے سات بار فائرنگ کی تھی، سے فون پر  15 منٹ تک بات چیت کی۔  29 سالہ جیکب بلیک پولیس کی گولیوں سے چھلنی اب بھی اسپتال میں ہیں۔ ان کی جان تو بچ گئی ہے تاہم ان کے وکیل کا کہنا ہے کہ گولیوں کے سبب کمر سے نیچے کا ان کا جسم مفلوج ہوسکتا ہے۔

جو بائیڈن نے کینوشا کے دورے کے دوران جیکب بلیک کے اہل خانہ کے ساتھ ایک گھنٹے تک ملاقات کی اور مقامی چرچ کا دورہ کرتے وقت انہوں نے اہم شخصیات کی ایک میٹنگ سے اپنے خطاب میں امریکا میں دور غلامی میں نسل پرستانہ تفریق اور اس دور کی افرا تفری کے خلاف ان کی جد و جہد کو یاد کیا۔

جو بائیڈن نے کہا، ''آخر کار اب ہم اس مقام پر پہنچ رہے ہیں جہاں ہم اس ملک کے اصل گناہ، 400 سالہ قدیم غلامی کی تاریخ اور اس کے آثار، کو ختم کرنے کی کوشش میں ہیں۔'' انہوں نے کہا کہ صدر ٹرمپ لاکھ کوششوں کے باوجود بھی 'بلیک لائیوز میٹر' مہم کو جس طرح کی بھاری اکثریت کی حمایت حاصل ہے اس پر وہ قابو نہیں پا سکے۔

بائیڈن کا یہ دورہ صدر ٹرمپ کے دورے کے دو روز بعد ہوا اور دونوں میں بہت فرق تھا۔ ٹرمپ نے اپنے دورے کے دوران محکمہ پولیس اور قانون نافذ کرنے والے اداروں کی حمایت کی اور جیکب بلیک کے اہل خانہ سے ملاقات تک نہیں کی۔

امریکا میں حالیہ مہینوں میں نسل پرستی اور پولیس کے زیادتیوں کے خلاف ملکی سطح پر مظاہرے ہوتے رہے ہیں اور ان مظاہروں کے دوران بعض دفعہ تشدد بھڑکنے کی وجہ سے چند افراد ہلاک بھی ہوئے ہیں۔ ان مظاہروں کی ابتداء ایک سیاہ فام شخص جارج فلوئیڈ کی پولیس کی تحویل میں ہلاکت کے بعد ہوئی تھی۔ دو سفید فام پولیس افسران نے جارج کو پکڑا تھا اور ان میں ایک نے انہیں زمین پر گرا کر ان کی گردن پر اپنا گھٹنا رکھ کر نو منٹ تک دبا ئے رکھا تھا۔ وہ اس دوران یہ کہتے رہے کہ میرا دم گھٹ رہا ہے تاہم پولیس نے ایک نہ سنی اور بالآخر ان کی جان نکل گئی۔

ریاست وسکونسن کے شہر کینوشا میں بھی چند روز قبل پولیس اہلکاروں نے ایک نہتھے سیام فام 29 سالہ جیکب بلیک پر سات بار فائر کیا تھا جس کے خلاف بڑے پیمانے پر مظاہروں کا سلسلہ شروع ہوگیا۔ وقت پر اسپتال پہنچنے کے سبب ان کی جان بچ گئی۔ تاہم اس واقعہ کے خلاف بھی احتجاجی مظاہروں کے دوران فائرنگ کے ایک واقعے میں دو افراد ہلاک ہوئے۔ اس سلسلے میں ایک 17 سالہ شخص کو گرفتار کیا گیا ہے۔

ص ز / ج ا (ایجنسیاں)