ٹوگو فُٹ بال ٹیم پر حملہ، ہلاکتوں میں اضافہ

کل جمعہ کے روز بندوق برداروں نے ٹوگو فٹ بال ٹیم کی گاڑی پر گھات لگا کر حملہ کر دیا تھا۔ اطلاعات کے مطابق اس حملے کے نتیجے میں بس ڈرائیور، ٹوگو فُٹ بال ٹیم کے اسسٹنٹ کوچ اور ایک اور افسر کی موت واقع ہوئی ہے۔

اس سے قبل برطانوی خبر رساں ادارے روئٹرز نے کہا تھا کہ اس حملے میں ٹوگو قومی فُٹ بال ٹیم کے دو کھلاڑی ہلاک جبکہ نو دیگر زخمی ہوگئے ہیں۔ تازہ اطلاعات کے مطابق ٹوگو ٹیم کے گول کیپر کی حالت انتہائی تشویش ناک ہے۔

دریں اثناء ’کنفیڈریشن آف افریقن فُٹ بال‘ نے کہا ہے کہ اس ناخوشگوار واقعے کے باوجود ’افریقن نیشنز کپ‘ ٹورنامنٹ پہلے سے طے شدہ شیڈول کے مطابق ہی جاری رہے گا۔ علٰیحدگی پسند گروپ ’فرنٹ فار دی لبریشن آف دی اینکلیو آف کابنڈا‘ FLEC نے اس حملے کی ذمہ داری قبول کرتے ہوئے مزید حملوں کی دھمکی بھی دی ہے۔ ٹورنامنٹ کل اتوار سے انگولا میں شروع ہو رہا ہے۔

خبر رساں ادارے/گوہر نذیر گیلانی