پاکستانی پنجاب میں شمسی توانائی کا جرمن منصوبہ

پنجاب حکومت اور جرمن کمپنی اے ای جی کے مابین تعاون کی ایک یادداشت پرمنگل کی شام لاہور میں دستخط کیے گئے۔ اس معاہدے کے مطابق جرمن کمپنی جنوبی پنجاب میں دو ہزار چودہ تک سورج کی روشنی کے ذریعے تین سو میگا واٹ بجلی پیدا کرنےکے لیے پاور ہاؤس قائم کرے گی۔

پنجاب حکومت کے توانائی کے محکمے میں پنجاب پاور ڈیویلپمنٹ بورڈ کے مینجینگ ڈائریکٹر افتخار احمد رندھاوا نے ڈی ڈبیلو، ڈوئچے ویلے کو بتایا کہ یہ جرمن کمپنی اپنے وسائل سے یہ منصوبہ مکمل کرے گی اور پنجاب حکومت معاہدے کے مطابق اس سے بجلی خریدے گی۔ انہوں نے مزید بتایا ’’ اے ای جی نامی یہ جرمن کمپنی شمسی توانائی سے حاصل شدہ جو بجلی ہمیں دے گی اس کی قیمت پاکستان میں تیل سے تیار کی جانے والی بجلی کی قیمت سے بھی کم ہو گی۔ پنجاب حکومت یہ بجلی تقریبا سترہ روپے فی یونٹ کے حساب سے خریدے گی۔"

رندھاوا کے مطابق اس منصوبے کی تعمیر کے دوران دو سو لوگوں کو روزگار ملے گا اور اس منصوبے کو چلانے کے لیے چالیس افراد کی خدمات درکار ہوں گی۔ ان کے بقول پنجاب کے لیے سولر انرجی ہی توانائی کے حصول کے لیے بہتر آپشن ہے۔

اس سلسلے میں ابتدائی طور پر اگلے مہینے سے جنوبی پنجاب کے صحرا چولستان میں ایک پائلٹ پراجیکٹ شروع کیا جا رہا ہے۔ اس مقصد کے لیے چولستان میں زمین حاصل کر لی گئی ہے۔ اس منصوبے کے تحت مارچ سن دو ہزارتیرہ تک اسی سے سو میگا واٹ شمسی بجلی کی تیاری کے لیے پاور ہاؤس قائم کیا جائے گا۔ جو کہ مارچ دو ہزار تیرہ تک بجلی کی سپلائی شروع بھی کر دے گا۔ بعد ازاں صوبے کے مختلف صنعتی علاقوں کو بجلی کی فراہمی کے لیے بھی شمسی توانائی سے چلنے والے بیس بیس میگا واٹ کے چھوٹے بجلی گھر قائم کیے جائیں گے۔ یاد رہے یہ کمپنی جرمنی میں سورج کی روشنی سے اب تک تیس ہزار میگا واٹ بجلی بنا چکی ہے۔ جو کہ پاکستان کی بجلی کی کل ضروریات سے تقریبا دگنی ہے۔

جرمنی میں پنجاب حکومت کے رابطہ کار اورسولر انرجی کے اس منصوبے کے اہم رکن شاہد ریاض گوندل نے ڈوئچے ویلے کو بتایا کہ یہ ایک ماحول دوست منصوبہ ہے، جس کے ذریعے زرمبادلہ کی بھی بچت ہو گی اور صنعتوں کی توانائی کی ضروریات کو بھی پورا کیا جا سکے گا۔ ان کے بقول اس منصوبے میں کوئی رننگ میٹیریل استعمال نہیں ہو گا اور اس سے کوئی مضر صحت بائی پراڈکٹ بھی پیدا نہیں ہو گی۔ پنجاب کے وزیر اعلی میاں شہباز شریف نے توقع ظاہر کی ہے کہ مزید جرمن کمپنیاں پاکستان آکر توانائی کے شعبے میں سرمایہ کاری کریں گی۔

رپورٹ: تنویر شہزاد، لاہور

ادارت: عدنان اسحاق