پاکستان: معاشی اور سیاسی بحران کے درمیان آج سالانہ بجٹ پیش

پاکستانی معیشت معاشی خسارہ اور افراط زر کی ریکارڈ بلند شرح کے دوہرے مار سے دوچار ہے جب کہ اس پر قرضوں کے ڈیفالٹ کا خطرہ بھی بڑھتا جا رہا ہے۔ ان وجوہات کے سبب بھی انتخابات سے قبل وزیر اعظم شبہاز شریف کی مقبولیت میں مزید کمی آئی ہے۔

پاکستان کی سب سے بڑی اپوزیشن جماعت پاکستان تحریک انصاف (پی ٹی آئی) کے رہنما اور سابق وزیر اعظم عمران خان اور طاقتور فوج کے درمیان جاری سیاسی رسہ کشی کے نتیجے میں ملکی معیشت مزید تباہی کے دہانے تک پہنچ سکتی ہے۔ اس سیاسی صورت حال کے درمیان وزیر خزانہ اسحاق ڈار جمعے کو شام چار بجے پارلیمان میں بجٹ پیش کریں گے۔

اس ہفتے کے اوائل میں بجٹ کے حوالے سے بعض اعداد و شمار کا اعلان کیا گیا تھا۔ اس کے مطابق ترقیات پر 1150ارب روپے خرچ کیے جائیں گے جب کہ اگلے مالی سال میں اقتصادی ترقی کا ہدف 3.5 فیصد مقرر کیا گیا ہے۔

پاکستان کے موجودہ معاشی بحران کا ذمہ دار کون؟

ذرائع نے روئٹرز کو بتایا کہ آئندہ مالی سال کے بجٹ میں مالی خسارہ7.7 فیصد رکھے جانے کا امکان ہے۔ 200 ارب روپے کے نئے ٹیکس فنانس بل کے ذریعہ لگیں گے اور مجموعی طور پر رواں مالی سال کی نسبت آئندہ مالی سال میں 1900ارب روپے اضافی اکھٹے کیے جائیں گے۔

افراط زر کی شرح 21 فیصد تک محدود کرنے کی تجویز ہے جو کہ مئی میں ریکارڈ تقریباً 38 فیصد کے مقابلے کافی کم ہے۔

آئی ایم ایف کی ہدایات

عالمی مالیاتی فنڈ (آئی ایم ایف) نے جمعرات کو کہا کہ بجٹ کے حوالے سے پاکستان کے ساتھ اس کی بات چیت ہوئی ہے اور امید ظاہر کی آج پیش ہونے والا بجٹ آئی ایم ایف پروگرام کے اہداف کے مطابق ہوگا۔

وزیر اعظم شہباز شریف کی حکومت آئی ایم ایف کو اس بات کے لیے رضامند کرنے کی کوشش کر رہی ہے کہ وہ سن 2019 میں منظور کردہ 6.5 ارب ڈالر کے امداد ی پروگرام میں سے بچی ہوئی 2.5 ارب ڈالر کی رقم جاری کردے۔ یہ معاہدے کی میعاد اس ماہ کے اواخر میں ختم ہونے والی ہے۔

پاکستانی بجٹ میں ابھی مزید اقدامات کی ضرورت، آئی ایم ایف

پاکستان میں آئی ایم ایف کی نمائندہ ایستر پیریز نے جمعرات کے روز کہا ہے کہ پاکستان مزید فنڈز کیلئے آج ایسا بجٹ دے جو آئی ایم ایف کے لئے قابل قبول ہو۔

انہوں نے کہا کہ پاکستان کو بجٹ سے متعلق آئی ایم ایف کو تین اہم معاملات پر مطمئن کرنا ہوگا اس کے بعد ہی آئی ایم ایف کا بورڈ جائزہ لے گا کہ پاکستان کو 2.5 ارب ڈالر جاری کئے جائیں یا نہیں۔

 ایستر پیریز نے کہا کہ پاکستان کے پاس آئی ایم ایف کے توسیعی فنڈ کی سہولت حاصل کرنے کا آخری موقع ہے۔ انہوں نے مزید بتایا کہ یہ بات پاکستانی حکام تک پہنچادی گئی ہے کہ موجودہ توسیعی فنڈ کی سہولت جون کے آخر میں ختم ہوجائے گی اور اس کے لیے بورڈ کا صرف ایک جائزہ اجلاس ہونا ہے۔

پاکستان اپنے تقریباً تمام معاشی اہداف پورے نہیں کرسکا

گزشتہ بجٹ میں پاکستان نے اپنے جو معاشی اہداف طے کیے تھے ان میں تقریباً تمام تک پہنچنے میں ناکام رہا۔ سب سے اہم چیز ترقی کا ہدف تھا جو 5 فیصد طے کیا گیا تھا لیکن اس سال کے اوائل میں اس پر نظر ثانی کرکے 2 فیصد کر دیا گیا۔ لیکن 30 جون کو ختم ہونے والے رواں مالی سال میں شرح نمو صرف 0.29 فیصد رہنے کا اندازہ لگایا گیا ہے۔

مرکزی بینک کی طرف سے جمعرات کو جاری اعداد و شمار کے مطابق غیر ملکی زدر مبادلہ کا ذخیرہ گر کر صرف 4 ارب ڈالر رہ گیا ہے، جو بمشکل صرف ایک ماہ کی درآمدات کے لیے کافی ہے۔

پاکستان میں مجوزہ فوجی بجٹ تنقید کی زد میں

حکومت کے پاس ایسے مقبول اقدامات متعارف کرنے کے لیے مالی گنجائش نہیں ہے جن سے ووٹ حاصل کرنے میں اسے مدد مل سکے یا اقتصادی سرگرمیوں کو تقویت حاصل ہوسکے۔

شہباز شریف کی اتحادی حکومت کو شاید تھوڑی راحت اس بات سے مل سکتی ہے کہ اپوزیشن لیڈر عمران خان ان دنوں کئی طرح کے مشکلات سے دوچار ہیں۔ فوجی کارروائی کے بعد ان کے کئی اہم ساتھی پارٹی چھوڑ چکے ہیں۔

عمران خان کو گزشتہ برس پارلیمان میں عدم اعتماد کی تحریک کے ذریعہ عہدے سے برطرف کردیا گیا تھا لیکن وہ اب بھی پاکستان کے مقبول ترین سیاسی رہنما ہیں۔ ان کے خلاف بدعنوانی سے لے کر قتل کی سازش جیسے الزامات ہیں اور اگر انہیں سزا ہوجاتی ہے تو وہ انتخابات میں حصہ نہیں لے سکیں گے۔

 ج ا/ ص ز (روئٹرز)