پرتگال میں ’شکاریوں کا بادشاہ‘ ڈائنوسارس دریافت

محققین کے مطابق ڈائنوسار کی یہ قسم یورپ میں دریافت ہونے والے شکاری ڈائنوسارز میں سے سب سے بڑی ہے۔ پرتگال کی NOVA یونیورسٹی سے تعلق رکھنے والے محققین کرسٹوف ہینڈرکس اور اوکٹاویو ماٹیئُس کے مطابق یہ قسم دراصل ڈائنوسارس کے زمانے کی سب سے بڑی اقسام میں سے ایک ہے۔

امریکی تحقیقی جریدے PLOS ONE میں اس دریافت کے بارے میں چھپنے والی رپورٹ کے مطابق اس ڈائنوسار کو ٹورووسارس گُرنیی Torvosaurus gurneyi کا نام دیا گیا ہے جو ٹِرانوسارس ریکس یا ٹی ریکس کی طرح دو قدموں پر چلتا تھا اور گوشت خور تھا۔ اس کے بلیڈ کی شکل کے دانتوں کی لمبائی 10 سینٹی میٹر یا چار انچ تک تھی۔

ماٹیوس کے بقول، ’’یہ بات بالکل واضح ہے کہ یہ ایک خوفناک شکاری تھا۔ یہ جہاں کہیں بھی جاتا تھا وہ جگہ پھر اس کی ہی ملکیت اور تصرف میں ہوتی تھی۔ ڈائنوسارز کے زمانے کے اختتامی حصے میں ٹورووسارس کا مقابلہ کوئی نہیں کر سکتا ہوگا۔ یہ ٹی ریکس کے برابر ہوتا تھا تاہم یہ اس سے 80 ملین برس قبل موجود تھا۔‘‘

سائنسدانوں کا اندازہ ہے کہ ٹورووسارس گُرنیی 10میٹر یعنی 33 فٹ تک لمبے اور چار سے پانچ ٹن تک وزن کے حامل ہوتے ہوں گے۔ اس جانور کے سر کی ہڈی قریب چار فٹ ( یا 115 سینٹی میٹر) لمبی ہوتی ہے جو ٹی ریکس کے مقابلے میں نسبتاﹰ چھوٹی ہے مگر یہ فرق بہت زیادہ نہیں ہے۔

پرتگال میں اس ڈائنوسار کے ملنے والے فوصل دراصل شمالی امریکی ٹورووسارس ٹینیری Torvosaurus tanneri سے مشابہت رکھتے ہیں۔ یہی وجہ ہے کہ ابتداء میں سائنسدانوں کا یہی خیال تھا کہ یہ شمالی امریکی ڈائنوسار ہی کی نسل سے تعلق رکھتا ہے۔ تاہم جب ان فوصل کا تفصیلی تجزیہ کیا گیا تو محققین کو اندازہ ہوا کہ بحر اوقیانوس کی دو مختلف جانب یہ دونوں اقسام علیحدہ علیحدہ پروان چڑھی ہوں گی جن میں کئی ملین سالوں کا فرق بھی موجود ہے۔

ماٹیوس کے مطابق یہ جاننا تو مشکل ہے کہ یہ دونوں اقسام جب زندہ ہوں گی تو ایک دوسرے سے کس قدر مختلف دکھائی دیتی ہوں گی۔ ہو سکتا ہے کہ ان کے رنگوں اور رویے میں فرق ہو جس کے باعث ان دونوں کو با آسانی الگ الگ شناخت کیا جا سکتا ہو۔

شمالی امریکا میں پائی جانے والی اقسام کے ڈائنوسارز کے اوپر والے جبڑے پر 11 یا اس سے زائد دانت ہوتے تھے جبکہ پرتگال میں ملنے والے اس نئے ڈائنوسار کے اوپری جبڑے میں 11 سے کم دانت ہیں۔ محققین کے مطابق اس کے چہرے کی ہڈیوں کی شکل اور ڈھانچہ بھی مختلف ہے۔