چینی صدر اور شہباز شریف کے مابین کیا کچھ طے پایا؟

چین کے سرکاری میڈیا  نے ملکی صدر شی جن پنگ کا حوالہ دیتے ہوئے لکھا ہے کہ بیجنگ حکومت پاکستان کی مالی صورت حال مستحکم بنانے کی کوششوں میں ساتھ دیتی رہے گی۔ چینی صدر کا یہ اہم بیان ایک ایسے وقت پر سامنے آیا ہے، جب پاکستانی وزیر اعظم شہباز شریف چین کے دورے پر ہیں۔

پاکستان میں آنے والے حالیہ تباہ کن سیلاب اور تقریباﹰ 30 ارب ڈالر کے مادی نقصانات کے بعد اسلام آباد حکومت کو ادائیگیوں کے حوالے سے عدم توازن کا سامنا ہے۔ قبل ازیں توقع کی جا رہی تھی کہ پاکستان چین سے لیے گئے قرضوں میں ریلیف حاصل کرنے کی کوشش کرے گا۔ پاکستان اور چین کے مابین دو طرفہ قرضوں کی مالیت تقریباﹰ 23 بلین ڈالر بنتی ہے۔

ملاقات میں کن معاملات پر اتفاق ہوا؟

چینی صدر شی جن پنگ نے وزیر اعظم شہباز شریف سے گریٹ ہال آف دا پیپل میں ملاقات کی۔ دونوں رہنماؤں نے اتفاق کیا کہ چین اور پاکستان کو اپنے اقتصادی راہداری منصوبے کی تکمیل کے لیے مزید مؤثر انداز میں آگے بڑھنا چاہیے۔ چینی صدر نے گوادر کی بندرگاہ کے لیے بنیادی ڈھانچے کی تعمیر کو بھی تیز کرنے کی ضرورت پر زور دیا۔

چین پاکستان میں کان کنی اور انفراسٹرکچر کے بڑے منصوبوں میں شامل ہے۔ ان منصوبوں میں گہرے پانی والی گوادر بندرگاہ کی تعمیر بھی شامل ہے۔ سی پیک منصوبے کی مجموعی مالیت 65 ارب ڈالر بنتی ہے۔

پاکستان کے ریلوے نیٹ ورک کو بہتر بنانے کا منصوبہ

چینی صدر نے مزید کہا ہے کہ مین لائن-1 (ML-1)کے آغاز کے لیے دونوں ملکوں کو مل کر راستے میں حائل رکاوٹیں دور کرنا چاہییں۔ مین لائن-1 کے تحت پاکستانی ریلوے کو اپ گریڈ کرنے کے ساتھ ساتھ کراچی سرکلر ریلوے کا منصوبہ بھی مکمل کیا جائے گا۔

جمود کا شکار سی پیک منصوبہ، پاکستانی وزیر اعظم چین پہنچ گئے

اب یونان کی سب سے بڑی بندرگاہ کا باس چین ہے

چین کے سرکاری میڈیا کے مطابق بیجنگ حکومت اپنے اتحادی ملک پاکستان کو 160 کلومیٹر فی گھنٹہ والی ہائی سپیڈ ٹرین ٹیکنالوجی بھی برآمد کرے گی۔ سی سی ٹی وی کے مطابق ٹرین کی 46 بوگیوں پر مشتمل پہلی کھیپ تین نومبر کو پاکستان روانہ کی جا رہی ہے۔ رپورٹ کے مطابق 184 بوگیوں کو پاکستان میں ہی اسمبل کیا جائے گا اور اس حوالے سے تمام تر پرزے بھی پاکستان پہنچائے جائیں گے۔ ایسا پہلی مرتبہ ہوا ہے کہ چین اپنی یہ ٹرین ٹیکنالوجی کسی دوسرے ملک کو برآمد کر رہا ہے۔

چین پاکستان کی اعلیٰ معیار کی زرعی اشیاء کی درآمد کا بھی خواہش مند ہے اور بیجنگ حکومت نے ڈیجیٹل معیشت، ای کامرس، فوٹوولٹائک اور توانائی کے متبادل ذرائع جیسے شعبوں میں تعاون بڑھانے کی خواہش کا اظہار بھی کیا ہے۔

صدر شی جن پنگ کو چین میں برسراقتدار کمیونسٹ پارٹی کے سربراہ کے طور پر اکتوبر میں تیسری مرتبہ منتخب کیا گیا تھا اور پاکستانی وزیر اعظم شہباز شریف اس انتخاب کے بعد ان سے ملاقات کرنے والے پہلے غیر ملکی رہنما ہیں۔

ا ا / م م (اے پی، روئٹرز)