چین اور بھارت کشیدگی ختم کرنے کی کوشش کریں، جرمن وزیر خارجہ

لداخ میں چینی اور بھارتی فوجیوں کے مابین منگل کو ہوئے ایک تصادم کے نتیجے میں بیس بھارتی فوجی مارے گئے تھے۔ گزشتہ پینتالیس برسوں میں دونوں ممالک کے مابین یہ خونریز ترین جھڑپ قرار دی جا رہی ہے۔

اس فوجی کارروائی کے بعد بھارت نے چین سے کہا ہے کہ وہ گلوان وادی پر اپنا حق جتانا بند کر دے۔ بھارتی فوجیوں کی ہلاکت کے بعد وزیر اعظم نریندر مودی کی حکومت پر عوامی دباؤ بڑھ گیا ہے کہ وہ چین کو مؤثر جواب دیں۔

ادھر اس تناؤ پر عالمی طاقتوں نے دونوں ممالک پر زور دیا ہے کہ وہ صبر وتحمل کا مظاہرہ کریں۔ جرمن وزیر خارجہ ہائیکو ماس نے ڈی ڈبلیو سے گفتگو کرتے ہوئے کہا کہ بھارت اور چین ہمالیہ ریجن میں واقع متنازعہ علاقوں کے ملکیت کا حل تلاش کرنے کے لیے پرامن مذاکرات کا راستہ اختیار کرے۔

یہ بھی پڑھیے:چینی اور بھارتی فوجیوں میں جھڑپیں، 20 بھارتی فوجی ہلاک

ہائیکو ماس نے کہا، ''یہ دونوں بڑے ممالک ہیں۔ میں یہ سوچنا بھی نہیں چاہتا کہ کوئی ایسا تنازعہ جنم لے، جس کی وجہ سے فوجی کارروائی کو ہوا ملے۔‘‘ انہوں نے مزید کہا کہ اسی لیے برلن حکومت ان دونوں ممالک کے مابین پائی جانے والی کشیدگی کو ختم کرنے کی کوشش میں ہے۔

ماس کے بقول بھارت اور چین کے مابین اس تنازعے میں جرمنی براہ راست ملوث نہیں ہو گا لیکن وہ اپنا اثرورسوخ استعمال کرے گا کہ کوئی عسکری جھڑپ شروع نہ ہو۔

جرمن وزیر نے کہا، ''میں نہیں سمجھتا کہ جرمنی کو اس معاملے میں ثالث کا کردار ادا کرنے کی ضرورت ہے۔ تاہم ہم اقوام متحدہ کی سلامتی کونسل کا حصہ ہیں اور جولائی میں ہم نے یورپی یونین کی صدارت بھی سنبھالنا ہے۔ مجھے یقین ہے کہ عالمی برادری کو توقع ہے کہ چین اور بھارت جیسے ممالک کو ایسے کسی بھی تنازعے سے بچنا چاہیے، جس کی وجہ سے نہ صرف یہ دونوں ممالک بلکہ پورا خطہ متاثر ہو۔‘‘

یہ بھی پڑھیے:چین بھارت کشیدگی: کیا کشمیر کی خصوصی حیثیت کی بحالی ممکن ہے؟

گزشتہ کچھ ہفتوں سے لداخ کے متنازعہ علاقوں میں چینی اور بھارتی فوجیوں کے مابین شدید کشیدگی دیکھی جا رہی ہے۔ دونوں ممالک ہی ان علاقوں پر اپنا حق جتاتے ہیں۔ منگل کے دن گلوان وادی میں واقع لائن آف کنٹرول پر دونوں ممالک کے مابین خونریز جھڑپ کے نتیجے میں بیس بھارتی فوجی مارے گئے تھے جبکہ چین نے کسی ہلاکت کی تصدیق کرنے سے انکار کر دیا تھا۔ اس واقعے کے بعد دونوں ممالک میں بالخصوص سوشل میڈیا پر حب الوطنی کا مظاہرہ کیا جا رہا ہے۔

ع ب / ع ا / ش ن