کاتالونیا کی آزادی کے مجوزہ ریفرنڈم کا پلان منسوخ

اسپین میں کاتالونیا کی علاقائی حکومت نے اعلان کیا ہے کہ اس خطے کی باقی ماندہ اسپین سے علیحدگی اور آزادی کے لیے اعلان کردہ متنازعہ ریفرنڈم کے انعقاد کا منصوبہ منسوخ کر دیا گیا ہے۔ آزادی کے اِس ریفرنڈم کو اسپین کی دستوری عدالت نے بھی غیر آئینی قرار دے دیا تھا۔ ریفرنڈم نہ کرانے کا فیصلہ پیر کے روز کیا گیا۔ کاتالونیا کی آزادی کے حق کی حامی سیاسی پارٹیوں کے ایک اجلاس میں ریفرنڈم کے انعقاد سے پیچھے ہٹنے کا فیصلہ کیا گیا۔ اب ہسپانوی صوبے کاتالونیا کی قوم پرست حکومت کے لیڈر آرتور ماس اپنے متبادل منصوبے کا اعلان آج منگل کے روز کریں گے۔ اِس سے قبل کاتالان حکومت نے واضح کیا تھا کہ وہ دستوری عدالت کے فیصلے کے باوجود ریفرنڈم کرانے کے اعلان پر عمل کرے گی۔

بارسلونا میں کاتالونیا کی قوم پسند علاقائی حکومت نے کچھ عرصہ قبل اعلان کیا تھا کہ یہ ریفرنڈم نو نومبر کو کرایا جائے گا۔ میڈرڈ حکومت نے کاتالان انتظامیہ کے سربراہ Artur Mas کے اس اعلان کی مخالفت کرتے ہوئے فوراﹰ کہہ دیا تھا کہ ایسا کوئی بھی ریفرنڈم غیر آئینی ہو گا۔ بارسلونا سے ملنے والی رپورٹوں کے مطابق کاتالان حکومت نے دوسری پارٹیوں سے مشورہ کرنے کے بعد ریفرنڈم کی منسوخی کا جو فیصلہ کیا ہے، وہ دراصل التواء کا فیصلہ ہے۔ کاتالونیا اسپین کا کافی امیر خطہ ہے، جس کا ملکی معیشت میں حصہ 20 فیصد کے قریب بنتا ہے۔

تجزیہ کار بھی اِس سے متفق ہیں کہ کاتالونیا کی حکومت کی طرف سے نو نومبر کے ریفرنڈم کے پلان کی منسوخی حقیقت میں آزادی کے اس ریفرنڈم کو ملتوی کرنے کے مترادف ہے۔ اِس مناسبت سے کاتالونیا حکومت کے بزنس اور لیبر شعبے کے انچارج فلپ پوئخ (Felip Puig) کا کہنا ہے کہ اُن کی حکومت اپنے ریفرنڈم سے متعلق خدشات اور تشویش کو قانون اور پرامن انداز میں آگے بڑھائے گی۔ فلپ پوئخ کے مطابق کاتالونیا کی آزادی کا ٹارگٹ نو نومبر کو حاصل کیا جائے گا یا پھر یہ ٹارگٹ بعد کی کسی اور تاریخ کو بھی حاصل کیا جا سکتا ہے۔

کاتالونیا میں باقی ماندہ اسپین سے علیحدگی اختیار کرنے کے ریفرنڈم کا جوش اُس وقت پیدا ہوا تھا جب برطانوی علاقے اسکاٹ لینڈ میں آزادی کے ریفرنڈم پر عمل کیا گیا تھا۔ اسکاٹ لینڈ کی قوم پرست قوتیں آزادی کے ریفرنڈم میں ناکام رہی تھیں۔ تازہ ترین رائے عامہ کے جائزوں کے مطابق کاتالونیا کے 23 فیصد عوام ریفرنڈم ملتوی کرنے کے حق میں ہیں جبکہ 45 فیصد کا خیال ہے کہ علاقائی حکومت کو دستوری عدالت کے فیصلے کو تسلیم کرنا چاہیے۔ اسپین کے قومی دن پر قدامت پسند وزیر اعظم ماریانو راخوئے نے کاتالان عوام کے ساتھ اسپین کے ثقافتی و سماجی روابط کا ذکر کرتے ہوئے کہا تھا کہ اختلافات کو رابطوں اور مکالمت کے پُلوں سے ختم کیا جائے گا۔