کراچی مویشی منڈی کے مہنگے اور خوبصورت جانور

کراچی کی سپر ہائی وے پر لگی مویشی منڈی قریب 800 ایکڑ اراضی پر پھیلی ہوئی ہے۔ اس منڈی کے مہنگے ترین جانوروں میں سے ایک یہ خوبصورت بیل بھی ہے جس کی قیمت 28 لاکھ لگائی گئی ہے۔

کراچی میں مختلف مقامات پر مویشی منڈیاں لگائی گئی ہیں۔ سپر ہائی وے پر لگی مویشی منڈی میں 28 مختلف بلاکس ہیں۔ اس منڈی میں مختلف کیٹل فارمز نے اپنے اسٹال لگا رکھے ہیں۔ ٹرپل اے کیٹل فارم کے اس جانور کی قیمت 26 لاکھ روپے ہے۔

اس مویشی منڈی میں چھ وی آی پی جبکہ 22 جنرل بلاکس ہیں۔ 18 لاکھ کا یہ بھورا بیل براہمن بریڈ کا ہے۔

وی آئی پی بلاکس میں جانوروں کی قیمتیں عام طور پر 15 لاکھ سے اوپر ہیں۔ ساہیوال نسل کا یہ دوسرا بیل بھی بڑی تعداد میں عوام کی توجہ حاصل کر رہا ہے۔ اس کی قیمت بھی 18 لاکھ ہے۔

کراچی سپر ہائی وے پر لگی مویشی منڈی میں اندازے کے مطابق ڈیڑھ لاکھ سے زائد بیل، گائیں، بھینسیں اور دیگر جانور لائے جا چکے ہیں۔ تاہم کورونا کے سبب معیشت متاثر ہے اور اسی لیے لوگوں کی قوت خرید میں بھی کمی واقع ہو چکی ہے۔ وی آئی پی بلاک میں یہ خوبصورت بیل 17 لاکھ میں فروخت ہوا ہے۔

دوسری طرف منڈی میں آنے والے بیوپاری بھی انتظامیہ کی جانب سے عائد کردہ ٹیکسز سے پریشان ہیں۔ ان کا کہنا ہے کہ سہولیات کے مقابلے میں ٹیکسز میں دگنا اضافہ کردیا گیا ہے۔ کراچی مویشی منڈی میں آسٹریلین نسل کے اس جانورکو 16 لاکھ میں خریدا گیا ہے۔

مویشی منڈی میں جانوروں کی خرید کے لیے آنے والوں کا شکوہ ہے کہ ان کی قیمت متوسط طبقے کی پہنچ سے دور ہوگئی ہے۔ وائٹ ٹائیگر نامی اس بیل کی قیمت 16 لاکھ طلب کی جا رہی ہے۔

ملک میں حالیہ عرصے کے دوران مہنگائی میں اضافے سے مویشی منڈی میں جانوروں کی قیمتیں بھی بڑھ گئی ہیں۔ مویشی منڈی کے وی آئی پی بلاک میں موجود سفید رنگ کا یہ خوبصورت بیل بھی 16 لاکھ میں فروخت کیا گیا ہے۔

کراچی جسے پاکستان کا معاشی حب قرار دیا جاتا ہے وہاں نسبتا کم آمدنی والے لوگ لاکھوں روپے کا جانور خریدنے سے قاصر ہیں۔ مویشی منڈی میں موجود 15 لاکھ روپے مالیت کا یہ کالا سانڈ بھی دیکھنے والوں کو اپنی جانب مشکل سے ہی متوجہ کر سکا ہے۔

کراچی مویشی منڈی میں زیادہ تر ساہیوال، چولستان، برہمن اور ملتانی نسل کے بڑے جانور موجود ہیں۔ اس مویشی منڈی میں لایا گیا یہ ساہیوالی بریڈ کا یہ بیل 14 لاکھ میں فروخت ہوا ہے۔

کورونا وبا کے سبب سپر ہائی وے پر لگی مویشی منڈی کے علاوہ شہر کی دیگر مویشی منڈیاں بھی شام سات بجے بند کر دینے کا اعلان کیا جا چکا ہے تاہم اس پر عمل درآمد کروانے میں انتظامیہ کو مشکلات کا سامنا ہے۔