’کورونا وائرس کی وبا میں کمی کا فی الحال امکان نہیں‘

آسٹریلیا کی سڈنی یونیورسٹی کے متعدی امراض کے  بین الاقوامی شہرت کے ماہر اور محقق ایڈم کماراٹ اسکاٹ نے واضح کر دیا ہے کہ کورونا وائرس سے ہونے والی ہلاکتوں سے ظاہر ہوتا ہے کہ اس وبا کے پھیلنے کا سلسلہ بدستور جاری ہے۔ اسکاٹ کے مطابق چینی حکومت کی تمام تر کوششوں کے باوجود یہ وبا پھیلتی جا رہی ہے اور اموات میں اضافہ بھی جاری ہے۔ انہوں نے یہ بھی کہا کہ جتنے بھی حفاظتی اقدامات اٹھائے گئے ہیں، وہ وبا کے پھیلاؤ کے مقابلے میں کم دکھائی دیتے ہیں۔

دوسری طرف چین کے نیشنل ہیلتھ کمیشن نے بتایا ہے کہ کورونا وائرس سے ہونے والی ہلاکتوں کی تعداد 1380 ہو گئی ہے۔ گزشتہ چوبیس گھنٹوں میں مزید ایک سو اکیس افراد نمونیا نما بیماری سے جانبر نہیں ہو سکے۔ بتایا گیا ہے کہ چین سے باہر ہونے والے ہلاکتوں کی تعداد تین ہو گئی ہے۔ تیسری ہلاکت جاپان میں ایک اسی سالہ خاتون کی ہے۔

اسی طرح چینی صوبے ہوبے کے ہسپتالوں میں پانچ ہزار سے زائد افراد میں وائرس کی تشخیص کی گئی ہے۔ نئی تشخیص کے بعد اس مرض میں مبتلا افراد کی تعداد چونسٹھ ہزار کے قریب پہنچ گئی ہے۔ چینی حکام کے مطابق سترہ سو سے زائد ہسپتالوں کے ملازمین میں بھی وائرس کی تشخیص ہوئی ہے۔ ان میں سے چھ ہیلتھ ورکرز بیماری میں مبتلا ہونے کے بعد دم توڑ چکے ہیں۔

دوسری جانب عالمی ادارہٴ صحت نے کہا ہے کہ تمام تر چینی کوششوں کے باوجود کورونا وائرس کی وبا کے پھیلاؤ میں فی الحال کوئی کمی ظاہر نہیں ہوئی ہے۔ عالمی ادارہٴ صحت نے کورونا وائرس سے پھیلنے والی بیماری کو 'کووڈ انیس (COVID-19) کا نام دیا ہے۔ اس بین الاقوامی ادارے نے پہلے ہی گلوبل ہیلتھ ایمرجنسی کا اعلان کر رکھا ہے۔

چین کے ہمسایہ ممالک میں بھی وائرس سے پیدا ہونے والی نمونیا نما بیماری کے پھیلنے کا خطرہ بڑھ گیا ہے۔ کمبوڈیا، جزیرہ نما کوریا، جاپان اور ویت نام میں وائرس کے پھیلنے کا خوف پایا جاتا ہے۔ امریکا نے چین کی اتحادی ہمسایہ ریاست شمالی کوریا کی کورونا وائرس سے نمٹنے کی محدود صلاحیت پر تشویش کا اظہار بھی کیا ہے۔

واشنگٹن نے اس کمیونسٹ ملک کی مدد کرنے کا عندیہ بھی دیا ہے۔ امریکی وزارت خارجہ کے بیان میں واضح کیا گیا ہے کہ واشنگٹن حکومت طبی تنظیموں اور بین الاقوامی کمیونٹی کی اُن امدادی کوششوں کی حمایت کرتی ہے، جو شمالی کوریا میں میں کورونا وائرس کے انسداد کے لیے کی جا رہی ہیں۔ شمالی کوریا نے اپنی چین کے ساتھ جڑی سرحد پہلے ہی بند کر دی ہے اور مشتبہ مریضوں کو قرنطینہ میں رکھنے کا سلسلہ بھی جاری ہے۔

ع ح ⁄ ع ب ( روئٹرز، اے ایف پی)