کیلیفورنیا میں ہم جنس پرستوں کی شادیاں: سپریم کورٹ سے دوبارہ پابندی کا مطالبہ

سان فرانسسکو سے ملنے والی رپورٹوں میں خبر رساں ادارے روئٹرز نے لکھا ہے کہ ہفتے کے روز دائر کی جانے والی اس آئینی اپیل میں سپریم کورٹ کے ججوں سے درخواست کی گئی ہے کہ ایسی قانونی شادیوں پر دوبارہ پابندی لگا دی جائے، جو ایک اعلیٰ عدالت نے پرسوں جمعے کے روز اچانک ختم کر دی تھی۔

پانچ سال سے عائد اس پابندی کے خاتمے کا فیصلہ ایک اپیل کورٹ نے کیا تھا اور اس کے بعد سے امریکی ریاست کیلیفورنیا میں ہم جنس پرست مرد اور خواتین بڑی تعداد میں اور جلدی جلدی آپس میں قانونی شادیاں کر رہے ہیں۔

کیلیفورنیا میں پانچ سال قبل ایک مقدمے کی سماعت کرنے والے ایک جج نے ہم جنس پرست افراد کی آپس میں شادیوں پر پابندی لگا دی تھی۔ اسے Proposition 8 کا نام دیا گیا تھا۔ تاہم جمعے کے روز سان فرانسسکو میں امریکی سرکٹ کورٹ آف اپیلز کی 9 ویں عدالت کے ایک تین رکنی بینچ نے اتفاق رائے سے اس پابندی کو غیر آئینی قرار دے دیا تھا۔ اس فیصلے کے چند ہی گھنٹوں کے اندر اندر ہم جنس پرست مردوں اور عورتوں نے وہاں باقاعدہ شادیاں کرنا شروع کر دی تھیں۔

نیوز ایجنسی روئٹرز نے لکھا ہے کہ کیلیفورینا میں ہم جنس پرست مرد اور خواتین بڑی تعداد میں آپس میں شادیاں کر رہے ہیں۔ کل ہفتے کی شام تک صرف سان فرانسسکو کے ٹاؤن ہال کے سامنے درجنوں ایسے ہم جنس پرست جوڑوں کی قطاریں دیکھنے میں آئیں جنہیں قانونی طور پر شادی کا موقع فراہم کرنے کے لیے شہری انتظامیہ نے اپنے دفاتر دیر تک کھلے رکھے ہوئے تھے۔

ان میں سے بہت سے ہم جنس پرست مرد اور خواتین ایسے بھی تھے جو کسی خاص تیاری کے بغیر روزمرہ کے لباس میں ہی شادی کرانے کے لیے قطار میں کھڑے ہو گئے تھے۔ اس دوران سان فرانسسکو کے ٹاؤن ہال کے باہر قریب ہر پندرہ منٹ بعد ایسی شادی کی ایک سرکاری تقریب مکمل ہو جاتی اور وہاں موجود افراد مسلسل تالیاں بجانے لگتے۔

سان فرانسسکو کی سٹی ایڈمنسٹریٹر ناؤمی کیلیNaomi Kelly نے روئٹرز کو بتایا کہ جمعے کے دن سے اب تک وہاں جو جوڑے آپس میں شادیاں کر چکے ہیں، ان میں ایک ایسا ہم جنس جوڑا بھی شامل تھا جو خاص طور پر اس شادی کے لیے ریاست ٹیکساس سے کیلیفورنیا آیا تھا۔

ان شادیوں کی اجازت دینے والی اعلیٰ عدالت کے فیصلے کو چیلنج کرتے ہوئے ریاست ایریزونا کے ایک شہری گروپ اتحاد برائے دفاع آزادی نے اپنی اپیل میں کہا ہے کہ یہ فیصلہ سنا کر متعلقہ عدالت نے اپنے اختیارات سے تجاوز کیا ہے، اس لیے یہ فیصلہ منسوخ کیا جائے اور کیلیفورنیا میں ہم جنس پرست افراد کی آپس میں قانونی شادیوں پر دوبارہ پابندی لگا دی جائے۔

ایسی شادیوں پر پابندی کے خاتمے کے بعد کیلیفورینا ایسی دسویں امریکی ریاست بن گئی گئی ہے جہاں ہم جنس پرستوں کو قانونی شادی کا حق حاصل ہے۔ تین دیگر امریکی ریاستوں میں ایسے قوانین آئندہ چند ہفتوں میں نافذ ہو جائیں گے، جن کے تحت ہم جنس پرست شہریوں کو ایک دوسرے سے شادی کا قانونی حق حاصل ہو جائے گا۔