کینیڈا: مسلمان خواتین پولیس افسران کو ‌حجاب پہننے کی اجازت

کینیڈا میں عوامی تحفظ کے وزیر رالف گوڈیل کے ترجمان نے ایک بیان میں کہا ہے کہ ملک کی رائل ماؤنٹڈ پولیس کے کمشنر نے حال ہی میں اپنی پالیسی میں ترمیم کرتے ہوئے مسلم خواتین کو وردی کے ساتھ حجاب پہننے کی اجازت دے دی ہے۔

حکومتی ترجمان سکاٹ بارڈسلی کا کہنا تھا کہ یہ فیصلہ کینیڈا میں ثقافتوں کے تنوع کی عکاسی اور زیادہ سے زیادہ مسلم خواتین کو پولیس کی ملازمت کی جانب راغب کرنے کے لیے کیا گیا ہے۔ کینیڈین پولیس فورس جسے ماؤنٹیز بھی کہا جاتا ہے، کو پچیس سال قبل اس وقت عوامی رد عمل کا سامنا کرنا پڑا تھا، جب ایک سکھ آفیسر نے پولیس یونیفارم کی بڑے کناروں والی ٹوپی کی جگہ سکھوں کی روایتی پگڑی پہننے کا حق عدالت کے ذریعےحاصل کیا تھا۔ کینیڈین باشندے اس وقت سے ہی ایسی تبدیلیاں دیکھنے کے عادی ہیں۔

بارڈسلی کے مطابق مختلف ممالک میں ایسی تبدیلیوں کا نفاذ پہلے سے ہی عمل میں لایا جا چکا ہے۔ ان میں کینیڈا میں ٹورانٹو اور ایڈمونٹن کے شہروں کی پولیس کے علاوہ برطانیہ، سویڈن اور ناروے کی پولیس فورسز شامل ہیں۔ اس کےعلاوہ چند امریکی ریاستوں میں بھی اس قسم کی تبدیلیوں کو اپنایا گیا ہے۔

رائل کینیڈین ماؤنٹڈ پولیس کی ایک ترجمان جولی گیگنن کا کہنا تھا کہ پولیس کے محکمے نے مسلم خواتین آفیسرز کے لیے ایک مخصوص طرز کا حجاب تیار کیا ہے تاہم حجاب پالیسی کے رواں برس جنوری سے نافذ ہونے کے بعد سے لے کر اب تک کسی خاتون پولیس افسر نے ڈیوٹی کے دوران حجاب پہننے کی درخواست نہیں کی ہے۔

جولی گیگنن نے مزید کہا کہ مسلمان خواتین افسران کو حجاب پہننے کے انتخاب کا حق دینا در اصل ماؤنٹیز کی افرادی قوت میں تنوع کی عکاسی کرتا ہے۔ یہ البتہ واضح نہیں ہے کہ ماؤنٹیز میں کتنی مسلمان آفیسر کام کرتی ہیں۔ کینیڈا میں حجاب کے حوالے سے یہ ترمیم فرانس کے بالکل برعکس ہے۔ فرانس کے کئی ایک شہروں میں تیراکی کے اس مخصوص لباس پر پابندی عائد کر دی گئی ہے جسے وہاں مقیم بعض مسلمان خواتین پہننا چاہتی ہیں۔