ہزارہ شیعہ برادری کو ’نسل کشی‘ کا سامنا، عبدالخالق ہزارہ

پاکستان میں شیعہ آبادی کی مختلف تنظیموں کی جانب سے بم دھماکوں میں شیعہ شہریوں کی ہلاکت کو مخصوص تناظر میں دیکھا جانے لگا ہے اور اسے ’نسل کشی‘ سے تعبیر کرنے کا عمل بھی شروع ہو گیا ہے۔ اس مناسبت سے لگائے جانے والے الزام کے سلسلے میں ایک انتہا پسند سنی تنظیم کے سکیورٹی ایجنسیوں سے مبینہ روابط اور سب سے بڑے صوبے پنجاب میں حکمران سیاسی جماعت کے ساتھ ممکنہ تعلق کو بھی اٹھایا جا رہا ہے۔

بلوچستان اور ملک کے دوسرے حصوں میں شیعہ کمیونٹی کو ٹارگٹ کر کے ہلاک کرنے کی ذمہ داری کالعدم انتہا پسند گروپ لشکر جھنگوی مسلسل قبول کر رہا ہے۔ یہ گروپ القاعدہ سے بھی وابستگی رکھتا ہے۔ امریکا اس گروپ کو ایک بین الاقوامی دہشت گرد تنظیم قرار دے چکا ہے۔ یہ تاثر تقویت پکڑ چکا ہے کہ لشکر جھنگوی کے علاوہ کچھ اور جہادی گروپ پاکستانی صوبے پنجاب میں اپنے ٹھکانے بنائے ہوئے ہیں۔

بلوچستان کی ہزارہ برادری کی سیاسی جماعت ہزارہ ڈیموکریٹک پارٹی کے سربراہ عبدالخالق ہزارہ کا خیال ہے کہ حکومت میں اس کی تمنا ہی نہیں کہ وہ ایسے دہشت گردوں کے خاتمے کی جانب عملی قدم اٹھائے اور ملک کی سکیورٹی ایجنسیاں ان کی ہمدرد ہیں کیونکہ یہی دہشت گرد گروپ ان ایجنسیوں کو مختلف معاملات کے آپریشن میں معاونت فراہم کرتی ہیں۔ عبدالخالق ہزارہ کا کہنا ہے کہ ہزارہ شیعہ برادری کو نسل کشی کا سامنا ہے کیونکہ یہ لوگ اپنے چہروں کے وسطی ایشیائی خد و خال کی بنیاد پر واضح انداز میں پہچانے جاتے ہیں۔

عبدالخالق ہزارہ کا یہ بھی کہنا ہے کہ ان کو اس بات کا کامل یقین ہے کہ پاکستانی سکیورٹی ایجنسیوں نے انتہا پسند گروپوں کو ختم کرنے کے حوالے سے تاحال کوئی فیصلہ نہیں کیا ہے۔ ہزارہ کے مطابق یہ سکیورٹی ایجنسیاں ان انتہا پسند گروپوں کے کارکنوں کو بھارت یا افغانستان میں استعمال کرنے کا بھی سوچتی ہیں۔

پاکستان کی شیعہ آبادی کے خلاف منظم حملوں کے تناظر میں قومی بحث کا عمل سیاسی پلیٹ فارموں پر زور پکڑتا دکھائی دے رہا ہے۔ اس عمل میں کراچی میں حال ہی میں ہونے والے حملے کے بعد مزید شدت پیدا ہوئی ہے۔ کراچی کے علاقے عباس ٹاؤن کی شیعہ مسجد پر ہونے والے حملے میں چار درجن ہلاکتیں ہوئی تھیں۔ رواں برس مختلف دہشت گردانہ واقعات میں تین سو کے قریب شیعہ شہریوں کی ہلاکت ہو چکی ہے۔

اسی تناظر میں یہ بھی اہم ہے کہ بلوچستان اور اسلام آباد میں پولیس حکام نے اپنی شناخت مخفی رکھتے ہوئے نیوز ایجنسی ایسوسی ایٹڈ پریس کو بتایا کہ انٹیلیجنس اداروں نے مختلف انتہا پسند گروپوں کے زیر حراست افراد کو رہا کرنے کا حکم بھی دیا تھا۔ ان ذرائع کے مطابق انٹیلیجنس اداروں کے توسط سے رہائی پانے والے تمام افراد کا تعلق لشکر جھنگوی سے یقینی طور پر نہیں تھا۔ پاکستان کے آبادی کے لحاظ سے سب سے بڑے صوبے پنجاب میں یہ تاثر عام ہے کہ لشکر جھنگوی اور دوسرے انتہا پسند گروپ سرعام اپنی سرگرمیاں جاری رکھے ہوئے ہیں۔ پاکستان میں پیپلز پارٹی کی قیادت میں قائم وفاقی حکومت کی جانب سے پنجاب حکومت پر الزام عائد کیا گیا ہے کہ وہ انتہا پسند سنی گروپوں کی سرپرستی کرتی ہے۔

ah/mm(AP)