ہوا سے آلودگی صاف کرنے والے نظام کا تجربہ

فضائی آلودگی کے سبب لوگوں کو سانس کی مختلف الرجیز کے علاوہ دمہ کی بھی شکایت پیدا ہوجاتی ہے۔ فضائی آلودگی کو کم کرنے کے لئے ہالینڈ کے سائنسدان نے ایک ایسا نظام ایجاد کیا ہے جو ہوا میں موجود مٹی کے بہت ہی باریک ذرات کو علیحدہ کرلیتا ہے، جس کے نتیجے میں ہوا بہت حد تک آلودگی سے پاک ہوجاتی ہے۔

ایمسٹرڈیم کی Delft Technical University کے نباتاتی شعبے کے سربراہ باب وین اُرسیم Bob Van Ursem کے مطابق ان کا تیار کیا ہوا الیکٹروسٹیٹک Electrostatic نظام مٹی کے بہت ہی باریک ذرات کو ہوا سے علیحدہ کرکے فضائی آلودگی میں کمی کا باعث بنتا ہے۔ ان کے اس نظام نے سال 2008 میں انٹرٹریفک انوویشن ایوارڈ بھی جیتا تھا۔

اس نظام کے لیبارٹری تجربات کے بعد وین ارسیم اور ان کے دو ساتھیوں جین ماریجینیسن اور Rijn Roos نے حال ہی میں پہلی مرتبہ بڑے پیمانے پر اس نظام کی جانچ کی ابتداء کی ہے۔

ہالینڈ کے ادارے ڈچ بلڈر BAM اور ڈچ حکومت کے ایئر کوالٹی انوویشن پروگرام نے ان تینوں سائنسدانوں کے تیار کردہ نظام کو روٹرڈیم کے قریب 1460 میٹر طویل سرنگ میں نصب کیا ہے۔ تین ماہ بعد اس بات کا جائزہ لیا جائے گا کہ اس نظام نے کس حد تک سرنگ میں موجود ہوا کو صاف کیا ہے۔

وین ارسیم کے مطابق لیبارٹری تجربات میں اس نظام کے توقع سے بہتر نتائج برآمد ہوئے، اور ہوا میں موجود مٹی کے باریک ذرات کو 100 فیصد علیحدہ کرلیا گیا۔ تاہم ارسیم کا کہنا ہے کہ سرنگ میں لگائے گئے نظام کے نتائج مختلف ہوسکتے ہیں۔ ان کا کہنا تھا کہ بڑے پیمانے پر یہ اس نظام کا پہلا تجربہ ہے، لہذا وہ اس بارے میں بہت زیادہ محتاط ہیں۔

ارسیم کے مطابق بڑے پیمانے پر اس تجربے کے بعد ان کا یہ نظام اگلے برس تک کمرشل بنیادوں پر تیاری کے لئے دستیاب ہوگا۔

رپورٹ : افسراعوان

ادارت : عاطف توقیر