یورپ کی سب سے بڑی مساجد میں ایک اور کا اضافہ

ماسکو سے ملنے والی نیوز ایجنسی اے ایف پی کی رپورٹوں کے مطابق روسی دارالحکومت میں اس نئی مسلم عبادت گاہ کے افتتاح کی تقریب سے خطاب کرتے ہوئے صدر پوٹن نے کہا کہ کئی ملکوں کو اس بات پر سخت تشویش ہے کہ ان کے جہادی نظریات کے حامل مسلم یا نو مسلم شہری دہشت گرد تنظیم اسلامک اسٹیٹ کی طرف سے شام اور عراق میں لڑ رہے ہیں۔

ولادیمیر پوٹن نے مختلف ملکوں، خاص کر مغربی معاشروں میں مسلم آبادی کے ایک چھوٹے سے حصے میں شدت پسند مسلمانوں کی جہادی تنظیموں کی طرف پائی جانے والی کشش کے خلاف خبردار بھی کیا۔

روسی دارالحکومت میں آج جس نئی مسجد کا افتتاح کیا گیا ہے، وہ 20 ہزار مربع میٹر رقبے پر پھیلی ہوئی ہے اور اس میں بیک وقت 10 ہزار نمازی نماز ادا کر سکتے ہیں۔ یہ مسجد روس کی سب سے بڑی مسجد ہے اور یہ ان روسی مسلمانوں کی مذہبی ضروریات پوری کرنے میں اہم کردار ادا کرے گی، جن کی تعداد کا اندازہ 20 ملین یا دو کروڑ لگایا جاتا ہے۔

ماسکو کی اس نئی اور انتہائی خوبصورت مسجد کی تعمیر قریب ایک عشرے میں مکمل ہوئی اور اس کی تعمیر پر کل 150 ملین یورو یا 170 ملین ڈالر کے برابر لاگت آئی۔ یہ منصوبہ گزشتہ برسوں کے دوران اس لیے کچھ متنازعہ بھی ہو گیا تھا کہ اسی جگہ پر پہلے ایک اور مسجد قائم تھی، جسے گرا کر مسلمانوں کی یہ نئی اور وسیع تر عبادت گاہ تعمیر کی گئی ہے۔

اس مسجد کی افتتاحی تقریب سے روسی صدر پوٹن کا خطاب ٹیلی وژن پر براہ راست نشر کیا گیا۔ اس موقع پر روسی صدر نے کہا، ’’یہ مسجد ماسکو اور پورے روس میں مسلمانوں کا ایک انتہائی اہم روحانی مرکز ہو گی، جو تعلیم کی ترویج کے علاوہ انسان دوستی کے نظریات اور اسلام کی حقیقی اقدار کے پھیلاؤ کا ذریعہ بھی ثابت ہو گی۔‘‘

روس کو، جسے اپنے جنوبی قفقاذ کے علاقے میں برسوں سے مسلمانوں کی مسلح بغاوت اور علیحدگی پسندی کا سامنا رہا ہے، اس بات پر بھی بہت تشویش ہے کہ اس کے قریب 1800 مسلمان شہری اس وقت شام اور عراق میں دہشت گرد تنظیم دولت اسلامیہ یا داعش کی طرف سے جہادی کارروائیوں میں حصہ لے رہے ہیں۔

اس تقریب میں مہمانان خصوصی کے طور پر شرکت کرنے والے ترک صدر رجب طیب ایردوآن اور فلسطینی صدر محمود عباس کی موجودگی میں اپنے نشریاتی خطاب میں صدر پوٹن نے مسلم جہادی عناصر پر تنقید کرتے ہوئے کہا کہ ایسی قوتیں عام لوگوں کے مذہبی جذبات کو اپنے سیاسی مقاصد کے لیے استعمال کرتی ہیں۔

ولادیمیر پوٹن نے مزید کہا، ’’ہم دیکھ رہے ہیں کہ مشرق وسطٰی میں نام نہاد دولت اسلامیہ کے دہشت گرد کس طرح اسلام جیسے عظیم مذہب کا نام استعمال کرتے ہوئے نہ صرف اس مذہب کو بدنام کر رہے ہیں بلکہ ساتھ ہی نفرتیں بھی بوتے جا رہے ہیں۔‘‘