یُنکر اور مہاجرین بریگزٹ کے لیے ذمہ دار ہیں، ہنگری

یہ بات ہنگری کے وزیر اعظم اوربان نے اتوار کے روز برسلز میں بریگزٹ سمٹ کے حاشیے میں کہی۔

اوربان نے کہا کہ برطانیہ کے یورپی یونین سے انخلا کے فیصلے کی ذمہ داری جزوی طور پر یُنکر پر عائد ہوتی ہے۔

اوربان نے ہنگری کے سرکاری میڈیا سے بات کرتے ہوئے کہا،’’پہلی غلطی یُنکر کو یورپی کمیشن کا صدر منتخب کرنا تھا جسے برطانیہ نے مسترد کیا تھا۔ دوسری غلطی یہ تھی کہ یورپی یونین نے مہاجرین کو قبول کیا لیکن وہ برطانیہ کو یورپی بلاک میں نہیں رکھ سکے۔‘‘

سن 2015 میں جب یورپ نے مہاجرین کے بحران کا سامنا کیا تب ہی سے وکٹور اوربان کی دائیں بازو کی عوامیت پسند حکومت کے یورپی یونین سے تعلقات تناؤ کا شکار رہے ہیں۔

یہ تعلقات اس وقت زیادہ خراب ہو گئے تھے جب رواں برس ستمبر میں یورپی پارلیمان نے ملک میں قانون کی حکمرانی کے حوالے سے ہنگری پر پابندیاں عائد کرنے کے لیے ووٹنگ کی تھی۔

ابھی حال ہی میں ہنگری نے اقوام متحدہ کے منظم مہاجرت کے حوالے سے مجوزہ معاہدے سے دستبرداری کا اعلان بھی کیا ہے۔

اس مجوزہ بین الاقوامی معاہدے کی منظوری آئندہ ماہ مراکش میں ہونے والی ایک عالمی کانفرنس میں دی جانا ہے۔ امریکا، آسٹریا، پولینڈ، اسرائیل اور آسٹریلیا سمیت متعدد ممالک اس معاہدے سے دستبرداری کا اعلان کر چکے ہیں۔ منظم، محفوظ اور باضابطہ مہاجرت کے اس بین الاقوامی معاہدے کی منظوری رواں سال جولائی میں ایک سو ترانوے رکن ممالک نے دی تھی۔

ص ح / ا ا / نیوز ایجنسی