یہودی آباد کاروں کا حملہ، فلسطینی بچہ جل کر ہلاک

خبر رساں ادارے اے ایف پی کے مطابق اس حملے کی وجہ سے اسرائیلیوں اور فلسطینیوں کے درمیان تناؤ میں مزید اضافہ ہو گیا ہے اور یہ واقعہ وزیر اعظم نیتن یاہو کی طرف سے متنازعہ طور پر مغربی کنارے میں یہودی آباد کاروں کے لیے مزید 300 گھروں کی تعمیر کی اجازت دینے کے محض دو روز بعد رونما ہوا ہے۔

فلسطینی سکیورٹی حکام کے مطابق چار حملہ آوروں نے ایک گاؤں کے داخلی حصے میں ایک گھر کو آگ لگا دی اور قریبی یہودی آبادی کی طرف فرار ہونے سے قبل انہوں نے ایک دیوار پر گرافیٹی بھی بنائی۔ اسرائیلی فوج کے مطابق دو گھروں کو آگ لگائی گئی جس میں ایک بچہ ہلاک جبکہ اس کے خاندان کے چار دیگر افراد زخمی ہو گئے۔ مزید یہ کہ گرافیٹی عبرانی زبان میں لکھی گئی ہے۔ فلسطینی ذرائع کے مطابق زخمی ہونے والوں میں بچے کے والدین اور ایک اور بچہ بھی شامل ہے۔

مقامی میڈیا کے مطابق حملہ آوروں کی طرف سے بنائی گئی گرافیٹی میں لکھا گیا ہے، ’انتقام‘ اور ’مسیحا زندہ باد‘۔ مزید یہ کہ حملہ آوروں نے دو گھروں میں فائر بم بھی پھینکے، جن میں سے ایک گھر خالی تھا۔

اسرائیلی وزیر اعظم بینجمن نیتن یاہو نے شمالی شہر نابلوس کے قریب دوما نامی گاؤں میں آتشیں بموں کے اس حملے کو ’ہر حوالے سے دہشت گردی کا ایک عمل‘ قرار دیتے ہوئے ملکی سکیورٹی فورسز کو حکم دیا ہے کہ وہ ذمہ دار عناصر کو تلاش کریں۔

تنظیم آزادی فلسطین PLO کی طرف سے کہا گیا ہے کہ وہ یہودی آباد کاروں کے حملے میں 18 ماہ کے علی سعد دوابشاہ کی ہلاکت کے لیے نیتن یاہو کی حکومت کو ’مکمل طور پر ذمہ دار‘ ٹھہراتی ہے۔ اس کی دلیل ہے کہ یہ ’اسرائیلی حکومت کی طرف سے آباد کاروں کی دہشت گردی کی کئی دہائیوں سے جاری پشت پناہی کا براہ راست نتیجہ ہے‘۔

اسرائیلی وزیر دفاع موشے یالون کے مطابق اس طرح کے حملے برداشت نہیں کیے جائیں گے: ’’ہم دہشت گردوں کو فلسطینیوں کی جانیں لینے کی اجازت نہیں دیں گے۔‘‘ اسرائیلی فوج کے مطابق وہ حملہ آوروں کو تلاش کر رہی ہے۔

خبر رساں ادارے اے ایف پی کے مطابق انتہائی دائیں بازو سے تعلق رکھنے والے یہودی کئی برسوں سے فلسطینیوں اور عرب اسرائیلیوں کے خلاف غنڈہ گردی اور تشدد کرتے رہے ہیں جن میں مسیحیوں اور مسلمانوں کی عبادت گاہوں اور یہاں تک کہ اسرائیلی فوجیوں پر کیے جانے والے حملے بھی شامل ہیں۔ اس طرح کے حملوں کو ’پرائس ٹیگ‘ تشدد کا نام دیا جاتا ہے، جس کا مطلب قوم پرست یہودی انتہا پسندوں کے نفرت پر مبنی جرائم ہیں۔