آسٹریلیا: 10 ہزار اونٹوں کو گولیاں مارنے کا پروگرام شروع

اونٹوں کو ہلاک کرنے کا یہ پانچ روزہ پروگرام آسٹریلیا کے جنوب میں شروع کیا گیا ہے۔ اس علاقے میں مقامی قبائل کے تقریبا تیئیس سو افراد آباد ہیں۔ اونٹوں کو ہیلی کاپٹروں میں بیٹھے نشانچی گولیاں مار رہے ہیں۔

آسٹریلیا کے جنوب میں قحط سالی جاری ہے اور بڑی تعداد میں اونٹ پانی اور خوراک کے تلاش میں مقامی دیہات کے قریب پہنچ چکے ہیں۔ حکام کے مطابق یہ مقامی آبادی کے لیے پانی کی سپلائی لائنوں اور بنیادی ڈھانچے کو متاثر کر سکتے ہیں۔ مقامی اے پی وائے لینڈ ایگزیکٹیو کمیٹی کے مطابق یہی وجہ ہے کہ دس ہزار تک اونٹوں کو ہلاک کرنے کی منظوری دی گئی ہے۔ اونٹوں کی ہلاکت میں ملکی ادارہ برائے ماحولیات بھی مدد فراہم کر رہا ہے اور اس حوالے سے فضائی نشانچیوں یا ایریل سنائپرز کی مدد لی گئی ہے۔

اے پی وائے لینڈز کے جنرل مینیجر رچرڈ کِنگ کا جمعرات کو نیوز ایجنسی ڈی پی اے  سے گفتگو کرتے ہوئے کہنا تھا کہ پہلے ہی دن تقریبا 1500 اونٹوں کو ہلاک کر دیا گیا ہے۔         

شدید گرمی اور قحط سالی

علاقے میں جاری شدید گرمی اور قحط سالی کی وجہ سے اس خطے کی مسائل بڑھ چکے ہیں اور پانی کی تلاش میں اونٹ ایک دوسرے کو بھی روندتے چلے جاتے ہیں۔ ساؤتھ آسٹریلیا انوائرمنٹ ڈیپارٹمنٹ کے ترجمان کا کہنا تھا، ''کچھ واقعات میں مردہ جانوروں کی وجہ سے پانی کے ذخائر آلودہ ہوئے ہیں اور کچھ ثقافتی مقامات بھی متاثر ہوئے ہیں۔‘‘  

آسٹریلیا کے محکمہ موسمیات نے جمعرات کو اعلان کیا ہے کہ سن 2019 آسٹریلیا کی تاریخ کا گرم اور خشک ترین سال تھا۔ آسٹریلیا میں اونٹوں کو ایک ایسے وقت میں ہلاک کیا جا رہا ہے، جب ملک کے دیگر حصوں میں لگنے والی جنگلاتی آگ نے کئی ملین ایکڑ رقبے پر لگے جنگلات کو جلا کر راکھ کر دیا ہے۔ اس جنگلاتی آگ کی وجہ سے کم از کم ستائیس افراد ہلاک اور ہزاروں گھر تباہ ہوئے ہیں۔

اونٹ آسٹریلیا کے مقامی جانور نہیں ہیں۔ انہیں انیسویں صدی کے وسط میں یہاں لایا گیا تھا۔ اب دنیا میں سب سے زیادہ جنگلی اونٹ آسٹریلیا میں پائے جاتے ہیں۔ اندازوں کے مطابق ان کی تعداد تقریبا ایک ملین ہے اور یہ کسی بھی شخص کی ملکیت نہیں ہیں۔

ا ا / ع ح  (ڈی پی اے، اے ایف پی)