آسیہ بی بی کے گھر والے اُن کی رہائی کے لیے پر امید

آسیہ بی بی کے گھر والے تاہم خوفزدہ ہیں کہ آسیہ کی رہائی کی صورت میں بھی پاکستان میں اُن کی زندگیوں کو خطرہ ہی لاحق رہے گا۔ گزشتہ پیر کے روز سپریم کورٹ نے آسیہ بی بی کی آخری اپیل پر فیصلہ محفوظ کرتے ہوئے سماعت ملتوی کر دی تھی۔

بی بی کے شوہر عاشق مسیح نے خبر رساں ادارے اے ایف پی کو بتایا،’’ ہمیں امید ہے کہ عدالت کی جو بھی کارروائی ہو، فیصلہ ہمارے لیے مثبت ثابت ہو گا۔‘‘

آسیہ بی بی کی بیٹی ایشام عاشق نے کہا،‘‘ میں اس دن بہت خوش ہوں گی جب میری والدہ کو رہا کیا جائے گا۔ میں انہیں گلے لگاؤں گی اور خدا کا بہت شکر ادا کروں گی۔‘‘

بی بی کا خاندان آج کل لندن میں ہے۔ ان کے اس دورے کا بندوبست ظلم و ستم کا شکار مسیحیوں کی مدد کے لیے قائم ’ایڈ ٹو دی چرچ ان نِیڈ‘ نامی ایک تنظیم نے کیا ہے۔

آسیہ بی بی کے شوہر اور صاحبزادی کا کہنا ہے کہ اگر آسیہ بی بی کو رہا کر بھی دیا جاتا ہے تو بھی اُن کا اب پاکستان میں رہنا مشکل ہو جائے گا۔

عاشق مسیح نے اپنے خدشات بیان کرتے ہوئے کہا،’’ پاکستان ہمارا ہے۔ ہم یہیں پیدا ہوئے اور پلے بڑھے۔ ہماری واحد تشویش توہین مذہب کے قانون کے حوالے سے ہے جسے یہاں رہنے والے مسیحیوں پر مسلط کیا جاتا ہے۔ لیکن ہمارے مسلمان بھائیوں کو سمجھنا چاہیے کہ مسیحی افراد قرآن کے بارے میں کبھی کچھ برا نہیں کہتے۔ اب ہمارے لیے پاکستان میں رہنا بہت مشکل ہے۔ ہم اپنے گھر سے باہر نہیں نکلتے اور نکلنا بھی پڑے تو بہت احتیاط سے باہر جاتے ہیں۔‘‘

آسیہ بی بی کو اس کے خلاف مقدمے میں سنائے جانے والے سزائے موت کے عدالتی حکم پر پاکستان میں اور بیرون ملک بھی سخت تنقید کی گئی تھی۔ بہت سے حلقوں کا الزام ہے کہ توہین مذہب کے موجودہ پاکستانی قانون کو کئی انتہا پسند مذہبی حلقوں کی طرف سے اکثر مذہبی بنیادوں پر نفرت اور ذاتی دشمنیاں نمٹانے کے لیے استعمال کیا جاتا ہے۔

ص ح / ع ب / نیوز ایجنسی