’اسرائیل کو رياست تسليم کيے جانے کا فيصلہ معطل کيا جائے‘

پی ایل او کی مرکزی کونسل کے چیئرمین سالم زنون نے اس تنظیم کی ایکزیگٹو کمیٹی سے مطالبہ کیا ہے کہ فلسطین کو اسرائیل کو تسلیم کرنے کے فیصلے کو اس وقت تک معطل کر دینا چاہیے، جب تک اسرائیل فلسطین کو آزاد ریادست تسلیم نہ کر لے۔ دوئم، یہودی بستیوں کی تعمیر کو روک نہ دے اور تیسرے یہ کہ شمالی یروشلم کے اسرائیل کے ساتھ الحاق کو منسوخ کرے۔ فی الحال یہ واضح نہیں کہ فلسطینی صدر محمود عباس پی ایل او لے اس مطالبے کی توثيق کريں گے یا نہیں۔

سن 2015 میں محمود عباس نے فلسطینی لیبریشن آرگنائزیشن کے اُس مطالبے کو نظر انداز کر دیا تھا جس میں اُس نے اسرائیل کے ساتھ سیکیورٹی تعاون ختم کرنے کو کہا تھا۔

پی ایل او کی مرکزی کونسل نے سن 2015 کے اُس مطالبے کی تجدید کرتے ہوئے ’پیرس پروٹوکول‘ نامی معاہدے سے علیحدہ ہونے کو بھی کہا ہے۔ اس معاہدے کے تحت دونوں ممالک کے اقتصادی معاملات کو کنٹرول کیا جاتا ہے۔

پی ایل او نے راملہ میں امریکی صدر ڈونلڈ ٹرمپ کے یروشلم کو اسرائیل کا دارالحکومت تسلیم کرنے کے اقدام کی جوابی حکمت عملی وضع کرنے کے لیے میٹنگ بلائی تھی۔

اسرائیل اور فلسطینیوں کے درمیان امن عمل کا آغاز سن 1990 میں ہوا تھا۔اسرائیل اور پی ایل او کے درمیان پہلا عبوری امن معاہدہ سن 1993 میں طے پایا تھا، جس نے محمود عباس کی فلسطینی اتھارٹی گورنمنٹ کے لیے راہ ہموار کی تھی۔ تاہم صدر ٹرمپ کے یروشلم کو اسرائیلی دارالحکومت تسلیم کرنے کے اقدام نے اس منقسم شہر میں عشروں سے جاری امریکی پالیسیوں کا خاتمہ کر دیا ہے۔ یہی وجہ ہے کہ فلسطین کے صدر محمود عباس نے اسرائیل اور فلسطین کے مابین امن کے لیے امریکا کی قیادت میں ہوئی ہر طرح کی کوششوں کو حال ہی میں مسترد کر دیا ہے۔