اسٹیلا نے زندگی مفلوج کر کے رکھ دی

نیو یارک، نیو جرسی، پینسلوینیا اور ورجینیا کی ریاستوں کے گورنروں نے ایمرجنسی نافذ کر دی ہے۔ نیو یارک کے گورنر انڈریو کواومو کے مطابق قدرت بعض اوقات ناقابل پیشگوئی ہوتی ہے۔

امریکا کے مشرقی ساحلی علاقوں میں بسنے والے کئی ملین لوگ ان دنوں ميں معمول کے درجہ حرارت کے مقابلے میں 10 سے 25 ڈگری سینٹی گریڈ تک کم درجہ حرارت کا سامنا کر رہے ہیں۔

مارچ ميں عام طور پر موسم بہار ہوتا ہے مگر امریکا کے شمال مشرقی حصوں میں غیر معمولی طور پر شدید برفباری ہوئی ہے۔ ایسا اسٹیلا نامی طوفان کے سبب ہوا ہے۔ تاہم اب اس طوفان کی شدت میں کمی واقع ہونا شروع ہو گئی ہے۔

بجلی فراہم کرنے والی کمپنیوں کے مطابق طوفان کی شدت کے سبب ایک بڑے علاقے تک بجلی کی فراہمی معطل ہو گئی، جس کی وجہ سے 220,000 سے زائد گھر اور کاروبار متاثر ہوئے۔

امریکی حکام کے مطابق بدھ کی رات پڑنے والی برف کی وجہ سے متعدد اسکول اور دیگر تعلیمی ادارے بند کر دیے گئے۔ اس کے علاوہ چھ ہزار سے زائد پروازیں بھی منسوخ کرنا پڑیں۔

اسٹیلا کے دوران چلنے والی ہواؤں کی رفتار ستر میل فی گھنٹہ ریکارڈ کی گئی ہے۔ شمال مشرقی امریکا کے کئی علاقوں میں حکام نے عوام سے گھروں میں رہنے کی درخواست کی ہے۔

امریکی محکمہ موسمیات نے دور دراز کے کچھ علاقوں ميں دو فٹ تک برف پڑنے کی پیشن گوئی کی ہے۔ تاہم اس طوفان کی شدت میں اب بتدریج کمی واقع ہو رہی ہے۔