اسپین کے نئے دستوری بادشاہ فلیپے ششم

اسپین کی دستوری بادشاہت پر 39 برس تک براجمان رہنے والے خوان کارلوس (Juan Carlos) نے بدھ کی شام تخت سے دستبرداری کی قانونی دستاویز پر دستخط کیے۔ یہ دستوری دستاویز ہسپانوی پارلیمنٹ سے منظوری کے بعد خوان کارلوس کو حتمی توثیق کے لیے پیش کی گئی تھی۔ اس دستاویز پر دستخط کے بعد بدھ اور جمعرات کی ٹھیک آدھی رات کو خوان کارلوس کے 46 سالہ بیٹے فلیپے ششم (Felipe VI) اسپین کے نئے دستوری بادشاہ بن گئے۔

دستبردار ہونے والے کِنگ خوان کارلوس نے پارلیمنٹ کے منظور شدہ قانون پر دستخط کرنے کے بعد اپنے بیٹے سے معانقہ کیا۔ اِس تبدیلی کے وقت اُن کی آنکھیں نم زدہ تھیں۔ اسپین کے جدید جمہوری دور میں دستوری بادشاہت میں یہ پہلی تبدیلی پیدا ہوئی ہے۔ ہسپانوی پارلیمنٹ کے منظور شدہ قانون کی توثیق کرنے کی تقریب میں علیل خوان کارلوس بغیر کسی سہارے کے کھڑے تھے۔ وہ حالیہ دنوں میں اپنی کمر کے مختلف آپریشنوں کے بعد باقاعدہ سہارے کے لیے چھڑی ہاتھ میں رکھتے ہیں۔ تقریب میں وہ اپنے بیٹے کے بازو کو تھامے ہوئے تھے۔

بادشاہت میں تبدیلی کے قانون میں تبدیلی کے بعد نئے بادشاہ کو ہسپانوی قومی ترانہ بجا کر ابتدائی سلامی دی گئی۔ آج صبح فلیپے ششم کے ہسپانوی بادشاہ بننے کی باقاعدہ تقریب کا اہتمام ہو گا۔ وہ آج پارلیمنٹ میں ہسپانوی دستور سے وفاداری کا حلف اٹھائیں گے اور پھر ایک جلوس کے ذریعے انہیں شاہی محل لے جایا جائے گا اور وہاں اُن کے سر پر تاج رکھ دا جائے گا۔ اُن کی خوبرُو اہلیہ لیٹٹسیا اب اسپین کی نئی ملکہ بن جائیں گی۔

قومی ترانے کے بعد دستبردار ہونے والے بادشاہ خوان کارلوس اور اُن کی اہلیہ ملکہ صوفیہ نے دیگر حاضرین کے ساتھ تالیاں بجا کر نئے بادشاہ کا خیر مقدم کیا۔ خوان کارلوس سن 1975 میں ہسپانوی ڈکٹیٹر فرانسیسکو فرانکو کی موت کے بعد تخت نشین ہوئے تھے۔ یہ امر اہم ہے کہ ڈکٹیٹر فرانکو نے خوان کارلوس کی بطور شاہ کے نامزدگی کی تھی۔ اُن کی شہرت کو حالیہ برسوں میں اُن اور ان خاندان کے افراد پر لگائے گئے کرپشن الزامات سے خاصی ٹھیس پہنچی تھی۔

ہسپانوی دارالحکومت میں کل شام سے ہی نئے بادشاہ کی تخت نشینی کے حوالے سے عام لوگ خاصے متحرک تھے۔ فلیپے ششم کی تصویر والی ٹی شرٹوں کی فروخت میں بےپناہ اضافہ دیکھا گیا ہے۔ میڈرڈ میں لوگ جمعرات کے روز جشن منانے کی پوری تیاری میں ہیں۔ دوسری جانب نئے بادشاہ فلیپے کو کئی چیلنجز کا سامنا ہے۔ سب سے اہم اپنے خاندان پر لگے بدعنوانیوں کے دھبوں کو صاف کرنا اہم خیال کیا جا رہا ہے۔ اس کے علاوہ اُن کا ملک کساد بازاری کا شکار ہے اور اِن دنوں شدید اقتصادی گراوٹ کا سامنا کر رہا ہے۔ اسی طرح کتلونیا کا علاقہ آزادی کا نقارہ بلند کیے ہوئے ہے۔