افغانستان سے بے ہنگم فوجی انخلا، امریکی جائزہ رپورٹ اگلے ماہ

واشنگٹن میں وائٹ ہاؤس سے کیے گئے ایک اعلان میں کہا گیا کہ افغانستان سے امریکی فوجی انخلا کا جائزہ لیے جانے کا عمل تقریباﹰ مکمل ہو گیا ہے اور اس جائزے کے نتائج پر مبنی رپورٹ اپریل کے وسط میں جاری کر دی جائے گی۔

اس رپورٹ کا اجرا طویل عرصے سے تاخیر کا شکار ہے۔ اس کے جاری کیے جانے کے بعد امریکی کانگریس اور عوام اپنے طور پر اس حوالے سے معاملات کا تجزیہ کر سکیں گے کہ ہندوکش کی ریاست سے افراتفری میں مکمل کیے گئے فوجی انخلا اور امریکی تاریخ کی طویل ترین جنگ کے اختتامی مراحل میں کیا کچھ غلط ہوا تھا۔

امریکہ نے 2021ء میں دو دہائیوں تک جاری رہنے والی جنگ کے بعد افغانستان سے اپنی فوج بڑے بےہنگم حالات میں واپس بلا لی تھی۔ اس انخلا کے ساتھ ہی افغانستان میں اس وقت کی ملکی حکومت اور فوج، جنہیں لمبے عرصے تک امریکی حمایت حاصل رہی تھی، کا دور عملاﹰ ختم ہو گیا تھا اور افغان طالبان دوبارہ اقتدار میں آ گئے تھے۔

اس فوجی انخلا کے بعد امریکی صدر جو بائیڈن نے اس پورے عمل کا جائزہ لیے جانے کے احکامات جاری کر دیے تھے اور ساتھ ہی یہ بھی کہا تھا کہ جائزے میں افغانستان سے واشنگٹن کی فوجی واپسی کے تمام پہلوؤں کو پرکھا جائے۔

یہ جائزہ رپورٹ افغانستان سے امریکی فوجی انخلا کےایک سال بعد یعنی اگست 2022ءمیں جاری کی جانا تھی مگر تب تک متعلقہ امریکی ایجنسیاں اس حوالے سے اپنا کام مکمل نہیں کر پائی تھیں اور یوں اس رپورٹ کا اجرا مسلسل تاخیر کا شکار رہا۔

بائیس مارچ بدھ کے روز امریکہ کی قومی سلامتی کونسل کے ترجمان جان کربی نے اپنے ایک بیان میں کہا کہ یہ جائزہ مرتب کرنے کا کام تقریباﹰ مکمل ہو چکا ہے اور بائیڈن انتظامیہ یہ رپورٹ اگلے ماہ جاری کرنے کا ارادہ رکھتی ہے۔ انہوں نے کہا، ''ہمیں توقع ہے کہ ہم عوام کے لیے (اس تجزیے کے) نتائج اپریل کے وسط تک جاری کر دیں گے۔‘‘

جان کربی نے مزید کہا کہ اس رپورٹ کے وہ کلاسیفائیڈ یا خفیہ حصے جو عام لوگوں کے لیے جاری نہیں کیے جائیں گے، وہ امریکی کانگریس کی نگران کمیٹیوں کو دکھائے جائیں گے۔

افغانستان سے امریکی فوجی انخلا کے بعد سے ہی بائیڈن مخالف اپوزیشن سیاسی جماعت ریپبلکن پارٹی سے تعلق رکھنے والے امریکی ایوان نمائندگان کے کئی منتخب اراکین حکومت پر دباؤ ڈال رہے ہیں کہ وہ یہ جائزہ رپورٹ اور فوجی انخلا سے متعلق سرکاری گفتگو کے ریکارڈ پر مبنی متعلق دستاویزات بھی جاری کرے۔

اس وقت اس فوجی انخلا کے حوالے سے دو سطحوں پر تحقیقات جاری ہیں۔ ان میں سے ایک کی قیادت ایوان نمائندگان کی خارجہ امور کی کمیٹی کے ریپبلکن سربراہ مائیک میکال کر رہے ہیں، جنہوں نے امریکی وزیر خارجہ انٹونی بلنکن سے جنوری میں متعلقہ دستاویزات کی فراہمی کی درخواست بھی کی تھی۔ کل بدھ کے روز میکال کو محکمہ خارجہ کی طرف سے ان دستاویزات کی پہلی کھیپ موصول ہو گئی تھی۔

آج تیئیس مارچ جمعرات کے روز بلنکن خارجہ امور کی اسی کمیٹی کے سامنے پیش ہوں گے اور امکان ہے کہ اس سماعت کے دوران ان سے افغانستان سے امریکی فوجی واپسی کے بارے میں بہت سخت سوالات پوچھے جائیں گے۔

م ا / م م (اے پی)