امریکا نے ڈبلیو ایچ او کو ترک کرنے کی کارروائی شروع کردی

امریکی حکام اور اقوام متحدہ کے اہلکاروں نے اس بات کی تصدیق کی ہے کہ امریکی صدر ڈونلڈ ٹرمپ نے عالمی ادارہ صحت سے امریکا کو الگ کرنے کے لیے کارروائی کا آغاز کر دیا ہے اور اس سلسلے میں اقوام متحدہ کو نوٹس بھیجنے کے ساتھ ساتھ امریکی کانگریس کو بھی آگاہ کر دیا گیا ہے۔

 امریکا کا کہنا ہے کہ اس نے ڈبلیو ایچ او میں جامع اصلاحات کا مطالبہ کیا تھا اور اس سلسلے میں اس سے براہ راست بات چیت کا مطالبہ کیا گیا تھا تاہم ادارے نے اس سے انکار کردیا جس کے بعد یہ کارروائی شروع کی گئی

اقوام متحدہ کے سکریٹری جنرل انٹونیو گوٹیرس کی ترجمان اسٹفینی دوجارک نے امریکی اقدام کی تصدیق کرتے ہوئے کہا کہ امریکا نے اس سلسلے میں ادارے کو نوٹس بھیجا ہے، جس کا نفاذ چھ جولائی 2021 سے ہوگا۔

امریکی کانگریس نے بھی نوٹس موصول ہونے کی تصدیق کی ہے تاہم ڈیموکریٹ پارٹی کے ایک سینیٹر رابرٹ مینینڈز نے اس حوالے سے ٹرمپ انتظامیہ پر شدید نکتہ چینی کی۔ انہوں نے لکھا، ''امریکی صدر نے عالمگیر وبا کے دوران عالمی ادارہ صحت سے امریکا کو الگ کرلیا ہے۔ کووڈ 19 کی وبا کے لیے امریکی صدر کے کام کاج کو بدنظمی اور بے ترتیبی سے تعبیر کیا جائے تو نا انصافی نہیں ہوگی، اس سے نہ تو امریکیوں کی زندگیاں محفوظ ہوں گی اور نہ ہی امریکا کا مفاد۔ اس سے امریکا بیمار ہوگا اور تن تنہا رہ جائے گا۔''

 کورونا وائرس کی وبا اور اس کے پھیلاؤ کے حوالے سے امریکی صدر ڈونلڈ ٹرمپ نے سب سے پہلے اپریل میں ادارے پر چین کے زیر اثر ہونے کا الزام عائد کرتے ہوئے اس کی فنڈنگ روکنے کی دھمکی دی تھی پھر مئی میں کہا تھا کہ ادارے میں بڑے پیمانے پر اصلاحات کی ضرورت ہے اور اگر اصلاحات نہ ہوئیں تو امریکا ڈبلیو ایچ او سے الگ ہو جائیگا۔ یورپی یونین اور بعض دیگر ممالک نے امریکا سے ایسا نہ کرنے کی گزارش کی تھی تاہم صدر ٹرمپ اس بات پر بضد تھے کہ وہ ڈبلیو ایچ او کا فنڈ دوسرے اداروں کو مہیا کریں گے۔

اب امریکا نے اقوام متحدہ کو اپنے فیصلے کے بارے میں ایک نوٹس بھیج دیا ہے تاہم اقوام متحدہ کے ضابطوں کے مطابق اس پر عمل کے لیے ایک برس کا وقت لگے گا یعنی اس کا نفاذ جولائی 2021 سے ہوگا۔ امریکی کانگریس کی ایک قرارداد کے مطابق امریکا اقوام متحدہ کے ادارے سے الگ ہوسکتا ہے تاہم اس کے لیے اسے ایک برس قبل نوٹس دینا ہوگا اور تمام بقایا جات ادا کرنے ہوں گے۔

ابھی یہ واضح نہیں کہ آیا صدر ٹرمپ امریکا کے اوپر واجب الادا رقم ڈبلیو ایچ او کو ادا کریں گے یا نہیں تاہم اسٹیفینی دوجارک نے اس بات پر زور دیا کہ امریکا کو چاہیے کہ وہ اس سلسلے میں تمام شرائط کو پورا کرے۔

ادھر ڈیموکریٹک پارٹی کے صدارتی امید وار جو بائیڈن، جو آئندہ نومبر میں ہونے والے صدارتی انتخابات میں ٹرمپ کے مد مقابل ہوں گے، کا کہنا ہے کہ اگر وہ کامیاب ہوئے تو عہدہ صدارت سنبھالنے کے پہلے ہی دن وہ اس فیصلے کو واپس لے لینگے۔ انہوں نے اپنے ایک ٹویٹ میں کہا، ''صدر بننے کے اپنے پہلے ہی روز میں ڈبلیو ایچ او میں دوباہ شامل ہوں گا اور عالمی سطح پر ہم اپنی قیادت کو دوبارہ بحال کریں گے۔''

امریکا عالمی ادارہ صحت(ڈبلیو ایچ ا و) کو دنیا کے دیگر ممالک کے مقابلے میں سب سے زیادہ رقم مہیا کرتا ہے اور ہر برس تقریباً15 فیصد اخراجات امریکا برداشت کرتا ہے۔ گزشتہ برس اس نے ادارے کو تقریبا ًچار ارب ڈالر کی رقم مہیا کی تھی۔ اگر امریکا اس سے الگ ہوجاتا ہے اور اس کی پندرہ فیصد فنڈنگ رک جاتی ہے تو ادارے کے اخراجات کو سنبھالنا مشکل ہوجائیگا اور صحت سے متعلق اس کے بڑے منصوبوں  پر عمل درآمد بھی بہت مشکل ہو جائے گا۔

ص ز / ج ا (ایجنسیاں)