امریکہ میں کرکٹ کے فروغ کےلئے پاکستان کی کوششیں
12 فروری 2010
سلامتی کی ابتر صورتحال کے باعث کرکٹ کی دنیا میں تنہائی کے شکار پاکستان کی نظریں اب کرکٹ کے لئے انجان دیس امریکہ پر لگی ہیں۔
پی سی بی کے چیئر مین اعجاز بٹ اور چیف آپریٹنگ آفیسر وسیم باری نے اس سلسلے میں امریکہ کرکٹ ایسوسی ایشن کے سربراہ ڈون لوکربی سے ملاقات کی ہے۔ پی سی بی کے مطابق امریکی بورڈ کے سربراہ سے ملاقات میں طے کیا گیا کہ رواں سال امریکہ میں ایک ٹوئنٹی ٹوئنٹی ٹورنامنٹ منعقد کیا جائے گا۔
ٹورنامنٹ میں اس طرز کی کرکٹ کی عالمی چیمپئین پاکستان کی ٹیم شرکت کرے گی۔ مقابلوں کی حتمی تاریخ اور دیگر ٹیموں کی تفصیلات ابھی طے کی جارہی ہیں۔ پاکستانی اور امریکی کرکٹ بورڈ کے مابین طویل المدتی تعاون کا عزم بھی ظاہر کیا گیا۔
امید کی جارہی ہیں کہ امریکہ میں بسنے والے لاکھوں جنوبی ایشیائی ، کرکٹ کے شوقین دیگر خطوں کے باشندے اور خود امریکی شہری مجوزہ ٹوئنٹی ٹوئنٹی مقابلوں میں گہری دلچسپی ظاہر کریں گے۔
پاکستان میں طویل اور مسلسل بدامنی نے کرکٹ سمیت یہاں کے باسیوں کی زندگی کے تقریباً ہر پہلو پر منفی نقوش چھوڑے ہیں۔ کرکٹ کے دیوانوں کے اس دیس میں اب غیر ملکی کرکٹ ٹیمیں آنے سے کتراتی ہیں۔ مجبوراً پاکستان کو اپنی ہوم سیریز دوسرے ملکوں میں جاکر کھیلنی پڑ رہی ہے تاکہ کسی طرح کھیل کو زندہ رکھا جائے اور شائقین کو کرکٹ دیکھنے کو ملتی رہے۔ اسی سلسلے کو دوام دیتے ہوئے آسٹریلیا کے خلاف ٹیسٹ سیریز رواں سال متوقع طور پر انگلینڈ میں کھیلی جائے گی۔
رپورٹ: شادی خان سیف
ادارت: ندیم گِل