امریکی صدارتی انتخابات کی گھڑی آگئی

امریکی شہری آج یہ فیصلہ کریں گے کہ جو بائیڈن کو اپنے نئے صدر کے طور پر پسند کرتے ہیں یا موجودہ اور 45 ویں صدر ڈونلڈ ٹرمپ کو چار برس کی ایک اور مدت کے لیے موقع دیں گے۔

اس سے قبل ریپبلکن امیدوار ٹرمپ اور ان کے حریف ڈیموکریٹک پارٹی کے جو بائیڈن نے ووٹروں کو اپنی طرف راغب کرنے کے لیے آخری لمحے تک کوششیں جاری رکھیں۔ دونوں نے انتخابات کے نتائج کو متاثر کرنے والی 'سوئنگ ریاستوں‘ میں انتخابی جلسے کرکے ووٹروں کو راغب کرنے کی حتی الامکان کوشش کی۔

امریکا میں تقریباً 24 کروڑ ووٹروں کو رائے دہندگی کا حق حاصل ہے۔ صدر ٹرمپ ان ووٹوں پر شبہ کا اظہار کرتے رہے ہیں اور ان کا کہنا ہے کہ یہ ووٹ انتخابی نتائج پر اثر انداز ہوسکتے ہیں۔

ٹرمپ نے نارتھ کیرولینا، پینسلوانیا اور وسکونسن میں انتخابی جلسوں سے خطاب کرتے ہوئے ووٹنگ کے دوران ممکنہ 'تشدد‘ کا ذکر کرنے کے علاوہ کہا کہ اگر ووٹوں کی گنتی کئی دنوں تک جاری رہی تو ’ایسی دھوکہ دہی ہوسکتی ہے جسے آپ نے کبھی نہ دیکھا ہو۔

کورونا وائرس سے دنیا میں سب سے زیادہ متاثر امریکا میں ملک اب بھی اس معاملے پر منقسم نظر آرہا ہے۔ امریکا میں اس مہلک وبا سے اب تک 95 لاکھ سے زائد افراد متاثر ہوچکے ہیں جبکہ دو لاکھ 36 ہزار سے زائد ہلاک ہوچکے ہیں۔ دونوں صدارتی امیدواروں نے اپنی انتخابی مہم کے آخری دن بھی اس موضوع پر اپنے خیالات کا اظہار کیا۔

فتح کی امید

ٹرمپ نے ایک بار پھر اپنی تقریروں میں کورونا وائرس کا ذکر کرتے ہوئے کہا کہ ”بائیڈن کو ایک ووٹ دینے کا مطلب ہوگا لاک ڈاون، مصائب اور نوکری سے ہاتھ دھونے کے لیے ایک ووٹ۔"

ٹرمپ کسی شواہد کے بغیر یہ الزام لگاتے رہے ہیں کہ ڈاک سے ووٹنگ میں گڑبڑی ہوسکتی ہے۔ حالانکہ انتخابات سے وابستہ ماہرین کہتے ہیں کہ امریکی الیکشن میں ایسا ہونا بہت ہی غیر معمولی بات ہوگی۔

ٹرمپ نے اپنی فتح کی امید ظاہر کرتے ہوئے کہا کہ”جیسے ہی ووٹنگ ختم ہوگی اسی رات ہم اپنے وکیلوں کے ساتھ صلاح و مشورے کریں گے۔  ٹرمپ نے ان خبروں کی تردید کی جن میں کہا گیا تھا کہ وہ الیکشن کے بعد منگل کو قبل از وقت ہی اپنی کامیابی کے اعلان کرنے کا منصوبہ بنارہے ہیں۔ ٹرمپ نے تاہم یہ ضرور واضح کیا کہ الیکشن کے بعد وہ قانونی لڑائی لڑنے کی تیاری ضرور کر رہے ہیں۔

” ٹرمپ کمزور آدمی ہیں“

دوسری طرف بائیڈن نے پٹس برگ اور اوہائیو میں عوام سے خطاب کے دوران کورونا وائرس کو پھیلنے سے روکنے کے لیے ایک بار پھر پابندیوں کی حمایت کرتے ہوئے کہا 'میرا آپ سے وعدہ ہے کہ ہم اس بات کو یقینی بنائیں گے کہ ہر امریکی کی محفوظ اور مفت کووِڈ 19 ویکسین تک رسائی ہو‘۔

بائیڈ ن نے ٹرمپ پر حملہ کرتے ہوئے کہا”ڈونلڈ ٹرمپ مضبوط نہیں ہیں۔ وہ کمزور آدمی ہیں۔ وہ ایک ایسے صدر ہیں جو قربانی کو نہیں سمجھتے، جو یہ نہیں جانتے کہ حوصلہ مندی کیا چیز ہے۔ انہوں نے مزید کہا ”ملک کو پولنگ کرنے سے روکنے کے لیے ان (ٹرمپ) کے پاس کچھ بھی نہیں ہے۔ امریکی عوام کی آواز کو دبایا نہیں جاسکتا ہے۔“

 رائے شماری کے جائزوں کے مطابق بائیڈن کو اپنے حریف ٹرمپ پر سات فیصد کی برتری حاصل ہے حالانکہ الیکشن کے دن دونوں کے درمیان برتری کا یہ فرق تھوڑا کم ہو گیا ہے۔

تجزیہ کاروں کا کہنا ہے کہ الیکشن میں خواہ کسی کی بھی کامیابی ہو لیکن یہ بات تو تقریباً طے ہے کہ امریکا کے اگلے صدر کا فیصلہ کرنے کے لیے عدالتوں میں ایک طویل عرصے تک مقدمہ چلتا رہے گا۔

ج ا/ ص ز (روئٹرز، اے پی)