امن کی پیامبر، کراچی کی بولتی دیواریں

خوبصورت رنگوں اور پیغامات سے سجی یہ دیواریںI am Karachi یا ’میں کراچی ہوں‘ نامی اس مہم کا حصہ ہیں جس میں شہر کی دیواروں پر گرافٹی اور آرٹ کے ذریعے امن اور محبت کا پیغام دیا جا رہا ہے۔

شہر کی دیواروں کو خوبصورتی دینے کے لیے پُر عزم نوجوانوں کی کمپنی آبدوز آرٹس کے تعاون سے اس مہم میں اب تک شہر کی کئی دیواروں کو شوخ رنگوں اور امن و محبت کے پیغامات سے سجایا جا چکا ہے۔

آبدوز آرٹس کے بانی عمر عاصم کے مطابق اس مہم میں ایک سو کے قریب فنکار حصہ لے رہے ہیں، جن میں مختلف تعلیمی اداروں کے طالب علموں سمیت بعض معروف آرٹسٹ بھی شامل ہیں۔

آئی بی اے، کراچی یونیورسٹی، انڈس ویلی اسکول آف آرٹس جیسے معروف اداروں کے طالب علم ہی نہیں بلکہ دیگر شعبوں سے تعلق رکھنے والے افراد بھی دھوپ اور گرمی کی پرواہ کیے بغیر اس مہم میں بڑھ چڑھ کر حصہ لے رہے ہیں۔

اس پراجیکٹ کو تین حصوں میں تقسیم کیا گیا ہے۔ پہلے حصے میں اسٹینسل آرٹ کے ذریعے پندرہ سو دیواروں پر آرٹ کے نمونے تیار کیے جائیں گے۔

دوسرے حصے میں پچاس آرٹسٹوں پر مشتمل ایک ٹیم اپنے انفرادی آرٹ کے نمونے شہر کی مختلف دیواروں پر پینٹ کر رہی ہے۔

تیسرا حصہ بچوں سے تبدیلی کے نام سے ہے، جس میں بچے مختلف سرکاری اسکولوں کی دیواروں پر پینٹ کریں گے۔

اب تک مولوی تمیز الدین خان یا ایم ٹی خان روڈ اور لیاری کی دیواروں پر کام کیا جا چکا ہے جبکہ دوسرے مرحلے میں ایئرپورٹ اور اطراف کی دیواروں پر کام شروع کیا جائے گا۔

ایم ٹی خان روڈ پر مکمل کیے گئے اس پراجیکٹ کو عوامی حلقوں اور سوشل میڈیا پر بے انتہا پذیرائی مل رہی ہے۔

آبدوز آرٹس کے عمر عاصم کہتے ہیں کہ ان دیواریوں پر کام کے دوران انہیں صرف عوام ہی نہیں بلکہ حکومت اور دیگر حلقوں کی جانب سے بھی بے حد پذیرائی اور حوصلہ مل رہا ہے۔

آئی ایم کراچی کی جانب سے جاری اس مہم کے دوران وہ دیواریں بھی اب صاف ستھری اور خوبصورت منظر پیش کر رہی ہیں، جہاں کبھی گندگی نظر آیا کرتی ہیں۔ ان دیواروں کو پینٹ کرنے سے قبل ان کی صفائی کا اہتمام بھی کیا جاتا ہے۔