امیر ترین ٹی وی اداکارائیں، پریانکا چوپڑا ٹاپ ٹین میں

کہا جاتا ہے کہ ٹیلی ویژن اپنے سنہری دور سے گزر رہا ہے۔ چاہے کیبل ٹی وی چینلز ہوں یا آن لائن اسٹریمنگ سروسز، آج ٹی وی پر بہترین کوالٹی کا مواد دیکھنے کو دستیاب ہے۔ یہی وجہ ہے کہ آج ٹی وی پر کام والے اداکار بھاری معاوضے وصول کر رہے ہیں۔

سالانہ 43 ملین ڈالر کے ساتھ سب سے زیادہ معاوضہ کمانے والی اداکارہ صوفیا ویرگارا ہیں۔ صوفیا مسلسل پانچ برسوں سے اس فہرست میں نمبر ون ہیں۔ صوفیا ویرگارا کو ٹی وی سیریل ’ماڈرن فیملی‘ کا اسٹار مانا جاتا ہے۔

سالانہ 24.5 ملین ڈالر کمانے والی کیلے کوکو اس فہرست میں نمبر دو پر ہیں۔ نامور ٹی وی سیریل ’بگ بینگ‘ میں ’پینی‘ نامی کردار نبھانے والی کیلے کوکو اس سیریل کی ایک قسط کے لیے ایک ملین ڈالر معاوضہ وصول کرتی ہیں۔

سالانہ 15 ملین ڈالر معاوضہ وصول کرتے ہوئے مینڈی کیلنگ اس فہرست میں تیسرے نمبر پر ہیں۔ مینڈی کیلنگ کا کہنا ہے،’’میں یہ واضح کرنا چاہتی ہوں کہ میں اپنے ہر شو میں حسین نظر آتی ہوں اور اس شو کے ہر مرد اداکارسے زیادہ معاوضہ حاصل کرتی ہوں۔

سالانہ 14.5 ملین ڈالر معاوضے کے ساتھ اس فہرست میں چوتھے اور پانچویں نمبر پر ایلن پومپیو اور ماریسکا ہرگیٹے ہیں۔ چھٹے نمبر پر کیری واشنگٹن اور ساتویں نمبر پر سٹانا کیٹک ہیں۔

سالانہ 11 ملین ڈالر معاوضہ حاصل کرنے والی ہیں، بھارت کی نامور اداکارہ پریانکا چوپڑا، جو اس فہرست میں آٹھویں نمبر پر ہیں۔ امریکی چینل اے بی سی کے سیریل ’کوانٹیکو‘ میں پریانکا کا طاقتور کردار انہیں اس فہرست میں لے آیا ہے۔

اس فہرست میں نویں نمبر پر جولیانا مارگیولس ہیں اور دسویں نمبر پر سالانہ دس ملین ڈالر کمانے والی ڈرامہ سیریل ’ماڈرن فیملی‘ کی اداکارہ جولی بوون ہیں۔