انتخابی تنازعےکے حل میں اہم ’پیش رفت‘ ہو گئی، افغان صدارتی ترجمان

پیر کے روز صدارتی انتخابات کے دونوں امیدواروں اشرف غنی اور عبداللہ عبداللہ کے درمیان ملاقات کے بعد ایک اعلیٰ سرکاری عہدیدار نے بتایا کہ ان دونوں رہنماؤں نے اقتدار میں حصہ داری کے حوالے سے ایک معاہدے پر اتفاق کر لیا ہے۔

عبداللہ عبداللہ اور اشرف غنی کے درمیان اس ملاقات کے بعد صدر حامد کرزئی کے ترجمان ایمل فیضی نے خبر رساں ادارے اے ایف پی سے بات چیت میں کہا، ’خوش قسمتی سے اس سلسلے میں پیش رفت ہوئی ہے اور میرے خیال میں یہ ایک بڑی کامیابی ہے۔‘

واضح رہے کہ رواں برس 14 جون کو ہونے والے صدارتی انتخابات کے دوسرے اور حتمی مرحلے کے بعد عبداللہ عبداللہ اور اشرف غنی نے انتخابات میں دھاندلی اور بے ضابطگیوں کے الزامات عائد کرتے ہوئے اپنی اپنی فتح کا اعلان کر دیا تھا، جس کے بعد ایک سیاسی بحران آ کھڑا ہوا تھا۔ اسی بحران کے خاتمے کے لیے امریکی وزیرخارجہ جان کیری نے سخت سفارتی کوششوں کے ذریعے دونوں رہنماؤں کو اس بات پر آمادہ کیا تھا کہ انتخابات میں ڈالے گئے تقریباﹰ آٹھ ملین ووٹوں کی تفصیلی جانچ پڑتال کی جائے اور اس کے بعد سامنے آنے والے نتائج کو دونوں رہنما تسلیم کریں۔ تاہم ووٹوں کی جانچ پڑتال کے لیے طے کردہ معیار پر دونوں رہنما اپنے اپنے تحفظات کا اظہار کر چکے ہیں۔

صدارتی ترجمان نے پیر کے روز اپنے بیان میں کہا، ’دونوں رہنما جلد ہی تمام متفقہ نکات کو ایک کاغذ پر اتار لیں گے اور صدر حامد کرزئی اور دیگر اہم افغان شخصیات کی موجودگی میں اس دستاویز پر دستخط کر دیے جائیں گے۔‘

یہ بات اہم ہے کہ انتخابات کے پہلے مرحلے میں عبداللہ عبداللہ سب سے آگے رہے تھے، تاہم دوسرے مرحلے کے عبوری نتائج میں اشرف غنی سبقت لیے ہوئے تھے۔ عبداللہ عبداللہ کا الزام رہا ہے کہ انہیں شکست دینے کے لیے ریاستی مشینری استعمال کی گئی۔

پیر کے روز اپنے بیان میں ان دونوں رہنماؤں کی ملاقات میں طے کیے گئے نکات کی تفصیلات فیضی نے نہیں بتائیں، تاہم کہا کہ اب دونوں صدارتی امیدواروں کے درمیان کوئی بھی حل طلب معاملہ باقی نہیں بچا۔