انسانی حقوق کا سخاروف یورپی انعام کانگو کے ڈاکٹر نے وصول کر لیا

ڈیموکریٹک رپبلک آف کانگو سے تعلق رکھنے والے مُکویگے کو یہ انعام اشٹراس برگ میں یورپی پارلیمان کے صدر مارٹن شُلز نے پیش کیا۔ اس موقع پر شُلز نے کہا کہ مُکویگے نے اپنے ملک میں خواتین کی عظمت، انصاف اور امن کے لیے گراں قدر خدمات انجام دی ہیں۔

59 سالہ مُکویگے کے حوالے سے یورپی پارلیمان کے صدر نے مزید کہا، ’آپ نے بے شمار خواتین اور لڑکیوں کی داد رسی کی۔ ان کو سہارا دیا تاکہ ان کے زخمی جسم اور ٹوٹی ہوئی ہڈیوں کا اندمال ہو سکے۔‘

سخاروف انعام دینے کی اس تقریب میں کانگو کے ایک وفد نے پارلیمنٹری گیلری میں گیت گایا اور پرچم لہرائے۔

مُکویگے جن کے لیے سخاروف انعام کا اعلان روﺍں برس اکتوبر میں کیا گیا تھا، کانگو میں اجتماعی جنسی زیادتی کی شکار خواتین کا علاج کرتے آئے ہیں۔

  انہوں نے اس تقریب میں اس امید کا اظہار کیا کہ اس انعام سے ان کے ملک میں خواتین کو درپیش خطرات اور مشکلات کے خاتمے میں مدد ملے گی، ’’یہ انعام دے کر آپ نے کانگو کی خواتین کی جدوجہد عالمی منظر نامے پر جگہ دے دی ہے۔‘‘ ان کے خطاب کے دوران متعدد مواقع پر یورپی قانون سازوں نے اپنی نشستوں سے کھڑے ہو کر انہیں خراج عقیدت پیش کیا۔

مُکویگے کا کہنا تھا، ’جنسی زیادتی کی شکار ہر خاتون میں مجھے اپنی بیوی، ہر معمر خاتون میں اپنی ماں اور ہر بچی میں اپنی بیٹی دکھائی دیتی ہے۔‘ خیال رہے کہ اس سے قبل یہ چہ مگوئیاں بھی کی جا رہی تھیں کہ ممکنہ طور پر مُکویگے کو نوبل انعام دیا جا سکتا ہے۔

سخاروف انعام کے لیے رنرز اپ یوکرائن میں انسانی حقوق کے لیے کام کرنے والا ایک جہوریت نوازگروپ رہا۔ اس تقریب میں اس گروپ کے ارکان کو بھی مدعو کیا گیا تھا۔ سخاروف انعام کے سلسلے میں تیسرے نمبر پر آذربائجان میں انسانی حقوق کے لیے سرگرم خاتون لیلہ یونس رہیں۔

یہ بات اہم ہے کہ باغی فورسز گزشتہ کئی دہائیوں سے معدنیات کی دولت سے مالا ملا  مشرقی کانگو میں قبضے کے لیے مسلح جدوجہد میں مصروف ہیں اور اس دوران ہزاروں خواتین کو اجتماعی جنسی زیادتی کا نشانہ بنایا جاتا رہا ہے۔