ایران کے جدید اور قدیم فِٹنس سینٹر

وسطی تہران کے ایک خوبصورت نئے ’سپورٹ پلس جِم‘ میں یورپی میوزک اونچی آواز میں چل رہا ہے۔ اسی فٹنس سینٹر سے دس منٹ کے فاصلے پر ’زر خانہ‘ ہے، یہاں ایک شخص بہت بڑے ڈرم کو بجا رہا ہے اور ڈرم بجاتے بجاتے وہ زور دار رونے کی آواز کے ساتھ مسلمانوں کے رہنما امام علی کو یاد کرتا ہے۔ اس شخص کے سامنےبھی لوگ ہزاروں برس پرانے روایتی آلات سے ورزش کر رہے ہیں۔

دوسری جانب سپورٹ پلس جِم میں ورزش کرنے والے افراد اپنے جسم کو فٹ رکھنے کے لیے مشق میں مصروف ہیں اور اپنی تصاویر کو انسٹاگرام پر شئیر بھی کرتے ہیں۔ یہاں انہیں انرجی ڈرنکس اور پھلوں سے بنائی گئی سمودیز پیش کی جاتی ہیں تو زر خانہ میں چھوٹی پیالیوں میں چینی کے ٹکڑوں کے ساتھ چائے پیش کی جاتی ہے۔

تہران کے ان جدید اور روایتی فٹنس سینٹرز میں بظاہر تو بہت زیادہ فرق ہے لیکن دونوں آج کے تہران کے عکاس ہیں۔ آج تہران کی نوجوان نسل کافی فروخت کرنے والے جدید کیفیوں، گیلریز اور فٹنس سینٹرر میں جانا پسند کرتے ہیں۔ اس وجہ سے ایران کی روایتی ثقافت کو نقصان پنہچا ہے لیکن اتنا نہیں جتنا کہ تصور کیا جارہا ہے۔

 ایران کے بازاروں، مساجد اور زرخانہ میں  فارس کی ثقافت کی مضبوط جڑیں ہیں۔ زرخانے کا آغاز لگ بھگ آٹھ سو برس پہلے سے ہوا تھا۔ تہران کی ایک فیکٹری کے ریٹائڑ ملازم حسین پیکنفر  باقاعدگی سے زرخانے جاتے ہیں۔ ان کا کہنا ہے،’’اب لوگ بہت مصروف ہوگئے ہیں اور ان کے پاس دوسری بہت سی چیزیں کرنے کو ہیں لیکن اب بھی بہت سے لوگ زرخانوں کو رخ کرتے ہیں۔‘‘

پیکنفر کے مطابق یہاں ورزش کا اسلام سے بہت گہرا رشتہ ہے۔ ایران کے سرکاری اعداد و شمار کے مطابق ملک میں لگ بھگ ایک ہزار زرخانے قائم ہیں۔ کہا جاتا ہے کہ پرانے وقتوں میں لوگ زرخانوں میں ورزش کرنے والے افراد کے پسینے کو ایک رومال کے ذریعے مریض کو لگایا جاتا تھا تاکہ اسے شفا ملے۔

ب ج/ ع ت، اے ایف پی