ایرانی کشتیوں پر امریکی انتباہی فائرنگ

امریکی وزارت دفاع کا کہنا ہے کہ دس مئی پیر کے روز آبنائے ہرمز میں ساحلوں کی حفاظت پر مامور امریکی بحریہ کے جہاز کی جانب متعدد ایرانی کشتیاں بہت تیزی سے بڑھ رہی تھیں جنہیں پیچھے واپس کرنے کے مقصد سے مشین گن سے دو بار وارننگ شاٹ فائر کرنے پڑے۔

پینٹاگون کے مطابق ایرانی فورسز پاسداران انقلاب سے وابستہ تیرہ ایرانی کشتیاں غیر محفوظ اور غیر پیشہ ورانہ طریقے سے اس علاقے میں سرگرم تھیں۔ یہ کشتیاں آبنائے ہرمز میں میزائلوں سے لیس امریکی بحری جہاز یو ایس ایس مونٹیری سمیت دیگر امریکی بحری بیڑے سے اتنی قریب پہنچ گئی تھیں کہ صرف 137 میٹر کا فاصلہ باقی بچا تھا۔ وارننگ شاٹ فائر کیے جانے کے بعد ایرانی کشتیاں واپس ہو گئیں۔ 

پینٹاگون کے پریس سکریٹری جان کربی نے ایک بیان میں کہا، ''افسوس کی بات ہے:  ایرانی پاسدارن انقلاب کی بحریہ کی طرف سے ہراساں کرنے کا یہ کوئی نیا واقعہ نہیں ہے۔یہی وہ چیز ہے جس کے لیے ہمارے کمانڈنگ افسران اور بحری عملے کو تربیت دی جاتی ہے۔''

ان کا مزید کہنا تھا، ''اس کارروائی کا شمار اس قسم کی سرگرمی میں ہوتا ہے جس کی وجہ سے کوئی بھی کسی وقت زخمی بھی ہو سکتا ہے اور پھر یہ خطے میں حقیقی غلط فہمی کا باعث بھی بن سکتی ہے۔ اور اس سے کسی کا کوئی بھی مفاد پورا نہیں ہوتا ہے۔''

خلیج فارس میں بڑھتی سرگرمیاں

 میزائلوں سے لیس امریکی بحری جہاز یو ایس ایس مونٹیری نے گزشتہ اتوار کے روز بحیرہ عرب میں ہتھیاروں سے بھرے ایک جہاز کو ضبط کیا تھا۔ باور کیا جاتا ہے کہ اسلحے کی یہ کھیپ یمن جا رہی تھی جہاں ایرانی حمایت یافتہ حوثی باغی سعودی عرب کی قیادت والے عسکری اتحاد سے بر سر پیکار ہیں۔

جان کربی کا کہنا ہے کہ پیر کے روز جن ایرانی کشتیوں پر وارننگ شاٹ فائر کیے گئے ان کا رویہ کافی جارحانہ تھا۔ ان کے مطابق پاسداران  انقلاب کی ان کشتیوں کو پیچھے کرنے کے لیے مشین گنوں سے دو بار فائرنگ کرنی پڑی۔

اسی طرح کا ایک اور واقعہ گزشتہ ماہ اس وقت پیش آیا تھا جب پاسدارن انقلاب سے وابستہ ایرانی جہاز کویت سے قریب خلیج فارس میں گشت کرنے والے امریکی جہاز سے کافی قریب پہنچ گئے تھے۔  اس وقت بھی وارننگ شاٹ فائر کرنے پڑے تھے جو گزشتہ چار برسوں کے دوران ایسا پہلا واقعہ تھا۔

امریکا اور ایران سنہ 2015 کے جوہری معاہدے کی بحالی کے لیے ویانا میں اس امید کے ساتھ مذاکرات کر رہے ہیں کہ امریکا اس معاہدے میں دوبارہ واپس آ سکے۔

ص ز/ ج ا   (اے پی، ڈی پی اے)