ایپل کمپنی اب بھارت میں آئی فونز بنائے گی

نیوز ایجنسی روئٹرز کے مطابق ایپل، فوکس کون نامی کمپنی کے مقامی یونٹ کے ذریعے بھارت میں آئی فونز بنائے گی۔ فوکس کون تائیوان کی کمپنی ہے جو ایپل کے لیے فونز بناتی ہے۔ یہ کمپنی ایپل کے ایکس فیملی کے فونز کو بھارت میں بنائے گی جو کہ ایپل کے سب سے مہنگے فونز ہیں۔ کاروباری دنیا کی یہ پیش رفت بھارت میں کاروبار کو ایک الگ ہی مقام پر لے جا سکتی ہے۔

ایپل کے فونز بھارتی ریاست تامل ناڈو میں بنائے جائیں گے اور یہ کمپنی اس منصوبے کے لیے بھارت میں 25 ارب روپے کی سرمایہ کاری کرے گی اور اس سرمایہ کاری کے ذریعے یہاں پچیس ہزار افراد کو روزگار ملے گا۔ اپیل کمپنی کی ترجمان ٹروڈی مولر نے اس حوالے سے روئٹرز کو اپنا کوئی بیان نہیں دیا جبکہ فوکس کون بھی اس حوالے سے میڈیا سے بات نہیں کر رہی۔

چار ڈالر کا اسمارٹ فون، ورکرز کے لیے خطرے کی گھنٹی

’آئی فونز اب بھارت میں بھی تیار ہوں گے‘

اب تک ایپل کمپنی اپنے فونز چین میں بنوا رہی تھی لیکن امریکا اور چین کے درمیان جاری تجارتی جنگ نے ایپل کو دوسرے خطوں میں جانے پر مجبور کر دیا ہے۔ فوکس کون جو کہ دنیا بھر میں الیکٹرانک اشیاء بنانے کی سب سے بڑی کمپنی ہے، اب ویت نام میں بھی اپنے فیکری قائم کرنے کا سوچ رہی ہے۔ فوکس کون ماضی میں یہ تسلیم کر چکی ہے کہ امریکا اور چین کے درمیان جاری تجاری جنگ اس لیے ایک بہت بڑا چیلنج ہے ۔ یہی وجہ ہے کہ وہ دنیا کے دوسرے خطوں میں کاروباری مواقع تلاش کر رہی ہے۔

 انٹرنیشنل ڈیٹا کارپوریشن میں بطور ایسوسی ایٹ ریسرچ ڈائریکٹر کام کرنے والے ناوکیندر سنگھ کا کہنا ہے،’’ فوکس کون کے ذریعے بھارت میں آئی فونز بنا کر ایپل اپنے لیے کاروباری رسک کو کم کرے گی۔‘‘ سنگھ کے مطابق بھارت میں آئی فونز کے بنائے جانے سے ایپل اس جنوبی ایشائی ملک میں سر مایہ کاری بڑھانے کے حوالے سے وزیراعظم نریندر مودی کے عزم کو مزید تقویت دے گی اور ایپل خود بھی بھارت کے لیے فونز برآمد کرنے پر ٹیکس اور ڈیوٹیوں سے بچ سکتا ہے۔ حال ہی میں ایپل کمپنی نے دنیا بھر  میں سرمایہ کاروں کو یہ معلومات فراہم کر کے حیران کر دیا تھا کہ 2018ء کے آخری تین ماہ میں اس کے فونز کی مانگ میں کمی آئی ہے۔