ایک آنکھ والا چوہا ہزاروں انسانوں کی جان بچانے میں’مدد گار‘

پِٹ کوئی انسان نہیں ہے بلکہ کمبوڈیا کے ’ایلیٹ چوہوں‘ کی ایک ٹیم سے تعلق رکھنے والا ایک چوہا ہے۔ ان چوہوں کو افریقہ سے امپورٹ کیا گیا ہے اور انہیں کمبوڈیا میں تربیت دی جا رہی ہے کہ وہ سونگھ کر بارودی سرنگوں کی نشاندہی کر دیں۔ کمبوڈیا میں جنگ اور تنازعات کے خاتمے کی کئی دہائیاں گزر جانے کے بعد بھی دیہی علاقوں میں بارودی سُرنگوں کا جال پھیلا ہوا ہے۔

کمبوڈیا کے بارودی سرنگوں کو صاف کرنے کے کام میں مہارت رکھنے والے ایک ماہر ہول سوکھنگ کہتے ہیں، ’’صاف آسمان تلے، یہ زیادہ تیز رفتاری کا مظاہرہ کرتا ہے۔‘‘ سوکھنگ 15 بڑے چوہوں کو قابو میں رکھنے والے 12 افراد کی تربیت کر رہے ہیں اور انہیں بتا رہے ہیں کہ کمبوڈیا کے فارم لینڈز اور دیہی علاقوں کو بارودی سرنگوں اور بموں سے پاک کرنے کے لیے ان چوہوں سے کس طرح کام لینا چاہیے۔

سوکھنگ کہتے ہیں، ’’یہ جان بچانے والے چوہے ہیں۔‘‘ انہوں نے مزید کہا کہ یہ چوہے کمبوڈیا جیسے ملک میں جہاں ہزاروں باشندوں کی جان بارودی سرنگوں اور دھماکا خیر مواد نے لی ہے، غیر معمولی کردار ادا کر رہے ہیں۔ ان چوہوں نے ہی کمبوڈیا کی بارودی سرنگوں اور اَن پھٹے بموں اور دیگر بارودی مواد کا سراغ لگا کر مزید جانیں ضائع ہونے سے بچا لی ہیں۔ کمبوڈیا کی حکومت کے اعداد و شمار کے مطابق 1979ء کی جنگ میں ان بارودی سرنگوں اور دھماکا خیز دیگر مواد نے قریب 20 ہزار باشندوں کی جان لی تھی اور قریب 44 ہزار زخمی ہوئے تھے۔

پِٹ سرنگوں میں پائے جانے والے بہت زیادہ دھماکا خیز مواد TNT کا سراغ سونگھ کر لگا لیتا ہے۔ اس کی نگرانی دو تربیت یافتہ افراد کر رہے ہوتے ہیں اور یہ پِٹ کو ایک رسی سے باندھ کر گھاس میں چھوڑ دیتے ہیں اور یہ ایک آنکھ والا چوہا اپنی سونگھنے کی حِس سے بتا دیتا ہے کہ کون سے علاقے بارودی سرنگوں کے خطرات سے دو چار ہیں اور یہ سرنگیں کہاں پائی جاتی ہیں۔

پِٹ اور اُس کے تمام دوستوں کا تعلق گیمبیا سے ہے اور یہ تھیلی نما چوہے ہیں۔ انہیں گزشتہ اپریل میں بیلجیم سے تغلق رکھنے والے ایک غیر سرکاری ادارے APOPO نے تنزانیہ سے کمبوڈیا تعینات کیا تھا تا کہ وہاں کی سرنگوں کی صفائی ہو سکے۔ ان چوہوں کی تربیت اُس وقت کی گئی تھی جب یہ چار ہفتوں کے تھے۔

تربیتی میدانوں میں جب پِٹ کو چھوڑا گیا تو اُس نے دھماکا خیز مواد TNT کو فوراً ہی سونگھ لیا اور اس کا سراغ لگا لیا۔ وہ وہیں رُک گیا اور اُس نے اُس جگہ مٹی کھودنا شروع کر دی۔ اس کارنامے پر اُس کے ٹرینر نے اس چوہے کو ایک کیلے سے نوازا۔

کمبوڈیا کی ’مائن وکٹم انفارمیشن سروس‘ کے ریکارڈ کے مطابق 1979ء سے اب تک بارودی سرنگوں اور دیگر دھماکا خیز مواد کی وجہ سے کمبوڈیا میں بہت بڑی تعداد میں ہلاکتیں رونما ہوئی ہیں۔ ہلاک ہونے والوں کی تعداد انیس ہزار چھ سو چوراسی بتائی گئی ہے۔

بارودی سرنگوں کا سراغ لگانے میں چوہوں کا استعمال اس لیے سب سے زیادہ مفید ثابت ہوتا ہے کیونکہ چوہے اتنے بھاری نہیں ہوتے کہ ان کے ٹکرانے سے کوئی دھماکہ خیر مواد پھٹ سکے۔ چوہے دراصل ’بم ڈیٹکٹرز‘ سے زیادہ موثر ثابت ہوئے ہیں۔