بحرین گراں پری منسوخ کر دی گئی

اس اعلان کے بعد ٹورنامنٹ میں شریک بارہ ٹیمیں اب اسپین کے بارسلونا سرکٹ کو لوٹ جائیں گی۔ بحرین گراں پری کی منسوخی کے بعد ستائیس مارچ کو ہونے والی آسٹریلین گراں پری ہی فارمولا وَن کا آئندہ بڑا ایونٹ ہو گی۔

بحرین سرکٹ کے حکام نے ایک اعلامیے میں کہا، ’’بحرین انٹرنیشنل سرکٹ، بی سی آئی، نے پیر کو اعلان کیا ہے کہ بحرین رواں برس فارمولا وَن گراں پری کی میزبانی نہیں کرے گا تاکہ ریاست اپنے ہاں مذاکراتی عمل پر توجہ دے سکے۔‘‘

بیان میں کہا گیا کہ کراؤن پرنس سلمان بن حماد الخلیفہ نے فارمولا وَن کے Bernie Ecclestone کو ٹیلی فون پر اس فیصلے سے آگاہ کر دیا ہے۔ فارمولا وَن کے منتظمین نے بھی بحرین کے اس فیصلے کو قبول کیا ہے۔

دوسری جانب بحرین میں مظاہرین تاحال سڑکوں پر موجود ہیں جبکہ شیعہ اپوزیشن ملکی قیادت میں تبدیلی کے لیے دباؤ بڑھا رہی ہے۔ وہاں دارالحکومت منامہ میں مظاہروں کا سلسلہ تقریباﹰ ایک ہفتے پہلے شروع ہوا، جس نے ریس کے انعقاد کو پہلے ہی شک و شبہے میں ڈال دیا تھا۔

مظاہرین ملک میں سیاسی اصلاحات کا مطالبہ کر رہے ہیں اور انہیں اس طرز پر آواز بلند کرنے کی تحریک تیونس اور مصر میں عوامی دباؤ کے باعث حکومتیں گرنے سے ملی ہے۔

کراؤن پرنس شیخ سلمان بن حماد الخلیفہ نے ایک بیان میں کہا ہے، ’’اس وقت ملک کی پوری توجہ قومی سطح پر ہونے والے مذاکرات پر ہے۔‘‘

انہوں نے مزید کہا، ’’گزشتہ ہفتے کے حالات کے بعد، ہماری قوم کی ترجیح دکھ سے نکلنا، اختلافات کو مٹانا اور اتحاد برقرار رکھنے والا جذبہ پھر سے پیدا کرنا ہے۔‘‘

خیال رہے کہ کراؤن پرنس کو شاہ حماد بن عیسیٰ الخلیفہ نے مذاکرات کی قیادت کرنے کی ذمہ داری سونپ رکھی ہے۔

رپورٹ: ندیم گِل/خبررساں ادارے

ادارت: امتیاز احمد